AQSh Iranmen qaqtyǵys bastalǵaly beri birneshe jylǵa jetýi tiis mańyzdy oq-dári qoryn aitarlyqtai sarqyp alǵan. Ásirese alys qashyqtyqqa ushatyn Tomahawk qanatty zymyrandary týraly sóz bolyp otyr. Bul týraly derekkózderge súiengen Financial Times jazdy, dep habarlaidy Dalanews.kz.
Basylymnyń málimetinshe, bul jaǵdaidyń saldaryn AQSh Áskeri-teńiz kúshteri aldaǵy birneshe jyl boiy sezinýi múmkin.
"Áskeri-teńiz floty munyń saldaryn birneshe jyl boiy kóretin bolady", – dedi basylymǵa derekkózderdiń biri.
Aldaǵy ýaqytta Pentagon Aq úi men Kongreske áskeri salaǵa qosymsha qarjy bólý týraly ótinish joldamaq. Áńgime shamamen 50 mlrd dollarǵa deiingi qosymsha qarjy týraly bolyp otyr.
Osy aptada Pentagon ókilderi senatorlarǵa soǵystyń alǵashqy alty kúninde AQSh shamamen 11 mlrd dollar jumsaǵanyn habarlaǵan. Bul qarajattyń basym bóligi oq-dárige ketken.
Financial Times derekkózi aldaǵy ýaqytta vedomstvo Kongreske jumsalǵan oq-dáriler týraly tolyq esep beretinin aitty.
Al Strategiialyq jáne halyqaralyq zertteýler ortalyǵynyń deregine sáikes, soǵystyń alǵashqy 100 saǵatynda AQSh 168 Tomahawk zymyranyn qoldanǵan. Basylymmen sóilesken kongresmenderdiń biri muny «óte úlken kólem» dep baǵalap, mundai qordy qalpyna keltirýge birneshe jyl qajet bolatynyn atap ótken.
Aita keteiik, bir Tomahawk zymyranynyń quny shamamen 3,6 mln dollar.
