AQSh-ta jas saiasatker stýdentter aldynda sóilep turǵan sátte oqqa ushty, dep habarlaidy Dalanews.kz.
Politsiia dereginshe, oq kórshiles kampýstyń shatyrynan atylǵan. 31 jastaǵy Charli Kirktiń qazasyn Donald Tramp rastady. AQSh Prezidenti marqumdy «uly, tipti ańyz tulǵa» dep atady. Tramp elde týlardy túsirýdi buiyrdy.
«AQSh-taǵy jastardy Charliden artyq eshkim túsingen de, sezingen de joq. Ony barlyǵy jaqsy kórdi ári qurmettedi, ásirese men. Endi ol aramyzda joq. Melaniia ekeýimiz onyń jary Erikaǵa jáne otbasyna kóńil aitamyz. Charli, biz seni jaqsy kóremiz!» – dedi Tramp áleýmettik jelide.
Kirk ólimshi jaraqatty Iýta alqaby ýniversitetiniń Orem qalasyndaǵy kampýsynda kúndizgi sóz sóileýi kezinde alǵanyn CBS jazdy. Politsiianyń aitýynsha, oq 180–200 metr qashyqtyqtan atylǵan. Beinejazbalarda oq atylǵan sáttegi dybys pen Kirktiń qulap túskeni, kórermenderdiń abyrjyp qasha bastaǵany kórinedi. Jaralanǵan Kirkti aýyr halde aýrýhanaǵa jetkizdi, biraq eki jarym saǵattan soń qaitys boldy.
FBR direktory Kash Pateldiń aitýynsha, Kirktiń boljaldy qylmyskerin ustaǵan, alaida ázirge onyń jeke basy jariialanbady.
Charli Kirk AQSh-taǵy eń tanymal konservativti jastar qozǵalystarynyń birine ainalǵan Turning Point USA uiymyn qurǵany úshin belgili. TPUSA maqsaty – jastar arasynda ońshyl ideialardy, dástúrli qundylyqtardy jáne ekonomikalyq liberalizmdi nasihattaý bolatyn. Kirk myqty sheshen sanaldy, radio men podkasttarda sóiledi, teleefirlerge shyqty jáne AQSh Respýblikashyl partiiasynyń sezderine qatysty.
