AQSh-qa kirýge arnalǵan vizany rásimdeý tártibine ózgeris engizildi. Endi álemniń 38 eliniń azamattary AQSh-qa B1/B2 sanatyndaǵy vizany (iskerlik sapar, týrizm, emdelý jáne ózge de qysqamerzimdi maqsattar) alý kezinde 5 myńnan 15 myń dollarǵa deiin kepildik qarjy engizýi tiis, dep habarlaidy Dalanews.kz.
Bul talap Ortalyq Aziianyń úsh eline de qatysty bolyp otyr. Atap aitqanda, tizimge Qyrǵyzstan, Tájikstan jáne Túrkimenstan azamattary engen. Kepildik qarjy konsýldyq viza berý múmkindigin maquldaǵannan keiin engiziledi. Degenmen kepildik tólenýi vizanyń mindetti túrde beriletinin bildirmeidi.
Kepildik qarjy engizip, viza alǵan azamattar AQSh aýmaǵyna tek úsh áýejai arqyly ǵana kirip-shyǵa alady. Olar: Boston Logan halyqaralyq áýejaiy (BOS), Djon Kennedi atyndaǵy halyqaralyq áýejai (JFK) jáne Vashington-Dalles halyqaralyq áýejaiy (IAD).
Eger viza iesi AQSh-tan belgilengen merzimde shyǵyp ketse, kepilge qoiylǵan qarajat tolyq kólemde qaitarylady. Sonymen qatar, viza berilmegen jaǵdaida da, nemese viza alynǵanymen AQSh aýmaǵyna kirmegen bolsa da, engizilgen qarjy keri qaitarylady.
Qysqasha aitqanda, Qyrǵyzstan, Tájikstan jáne Túrkimenstan azamattary úshin AQSh-qa barý talaptary taǵy da kúrdelene túskendei.
