Atyraýda tórt adamdy óltirdi dep aiyptalǵan Sultan Sársemálievke qatysty sot protsesi jalǵasyp jatyr. 2026 jyldyń 4 maýsymyndaǵy otyrysta Qarabalinder otbasynyń malyn baqqan turǵyn kýá retinde jaýap berdi, dep habarlaidy dalanews.kz.
Kýániń aitýynsha, 2025 jyldyń qarasha aiynda Maqsot Qarabalinniń qoi kezegi kelgen. Sol kezde ol otbasynyń ornyna mal baǵyp, eńbekaqysyn keshki ýaqytta Kaspi qosymshasy arqyly alyp otyrǵan.
"Malyn kúndelikti baǵyp júrdim. Qoi, eshki, baspaq boldy. 25-i kúni qyrdaǵy maly keldi. Qys boiy, eki ai sony da baqtym. Úiinde úsh siyry bar edi, jalpy jeti siyr bolatyn. Naýryzǵa aqsha kerek bolǵanda jazyp turdym, sol kezde aýdardy. Kúndelikti aqsha aýdarǵan joq. 2026 jyldyń 25 qańtaryna deiin baǵyp berdim. Eki ailyq jumysyma bir baspaq beredi dep keliskenbiz", – dedi kýá.
Sondai-aq ol 2025 jyldyń 15-20 qarashasy shamasynda Naýryz Muqanǵalievten habarlama kelgenin aitty. Kýániń sózinshe, habarlamada "sheshem aýyryp jatyr, operatsiiaǵa aqsha kerek" delingen.
"Mal satamyn, satyp alatyn adamdy ózim jiberemin dedi. Maǵan tek maldy kórsetip berýimdi surady. Keiin adamdar keldi, ózderi ekeýara kelisti. Meniń oǵan qatysym joq", – dedi kýá sotta.
Kýá sol kezde telefonnyń ar jaǵyndaǵy habarlamany Naýryz Muqanǵaliev jazyp otyr dep oilaǵanyn jetkizdi.
