Aqparat jáne qoǵamdyq damý ministri Dáýren Abaev Facebook-tegi Aisultan Rahattyń jazbalaryna qatysty pikir bildirdi, dep habarlaidy Dalanews.kz.
Ministr esirtkige táýeldilikten emdelip júrgen adamnyń ashylyp sóilegen sózinen dáiek keltirip, onyń aitqanyn mysalǵa alý ádepsizdik dep sanaidy.
Bul jaǵdaida onyń ashylyp sóilegen sózi emes, densaýlyǵynyń jaǵdaiy alańdaýshylyq týǵyzady. Men onyń jazbasy belgili bir adamdardyń manipýliatsiiasymen jazylǵan dep naqty aita alamyn. Ókinishti árine, biraq búginderi Aisultannyń janynan onyń aty men densaýlyǵynyń jaǵdaiyn paidalanatyn adamdar tabylǵan, - dedi ministr "Habar" telearnasyndaǵy "Ashyq dialog" baǵdarlamasyna bergen suqbatynda.
Abaevtyń aitýynsha, Aisultan uzaq ýaqyt boiy psihoaktivti zattardyń áserinde bolǵan.
Onyń aitqanyn mysal etý, bireýlerge reitingi ákeledi, sondyqtan ony jaqsy túsinemin. Biraq bul - arzan reitingter. Óitkeni ol adamnyń baqytsyzdyǵynan quralǵan. Sondyqtan bul taqyrypty jabatyn ýaqyt keldi! Táýeldi adamnyń qiialyn tek elimizdiń Tuńǵysh Prezidentiniń nemeresi bolǵandyqtan san-saqqa júgirtý - arsyzdyq, ádiletsizdik jáne ádepsizdik, dep jalǵastyrdy óz sózin ministr.
Elbasy - bul elimizdiń damýyna úlken úles qosqan jáne áli de úles qosýdaǵy tulǵa. Bizdiń jerimizde beibitshilik, turaqtylyq pen kelisimdi saqtady. Al qazir bolyp jatqandardyń barlyǵy - ol kisiniń bedelin túsirýge tyrysyp jatqan ólermendik. Bizdiń elge qysym jasaý, las oiyndar qurý - bul jazasyz qalmaityn nárseler, - dep sózin túiindedi Abaev.
