Almatyda jumbaq jaǵdaida qaza tapqan Aqnár Gúlstannyń anasy keshe áleýmettik jelide Prezident Qasym-Jomart Toqaevtan kómek surap, úndeý jasady. Politsiia osy jaittan keiin málimdeme jasady, dep habarlaidy Dalanews.kz.
Almaty qalalyq PD málimetinshe, tergeý basqarmasy byltyr shildede Almaty turǵynynyń ólimine qatysty qylmystyq is qozǵaǵan.
"Qazir bolǵan oqiǵanyń tolyq kórinisin anyqtaý úshin jan-jaqty tergeý júrip jatyr. Tergeý sheńberinde materialdar jinaqtalyp, taldanyp, kýálardan jaýap alynyp, beinejazbalar zerdelenip, zańda kózdelgen basqa da protsessýaldyq áreketter júzege asyrylyp jatyr. Tergeý barysy departament basshylyǵynyń erekshe baqylaýynda. Biz marqumnyń týystarynyń bastan keshken qaiǵysyna shyn júrekten ortaqtasamyz. Sonymen qatar, sońǵy protsessýaldyq sheshim barlyq taǵaiyndalǵan saraptama nátijelerin alǵannan keiin jáne qajet tergeý áreketterin júrgizgennen keiin qabyldanady", - dedi PD ókilderi.
Aita keteiik, keshe marqumnyń anasy Gúlstan Qamit Almaty qalalyq tergeý organdary men prokýratýrasy bul isti jeńil bappen ózine ózi qol jumsaýǵa itermeleý dep baǵalap, shynaiy tergeý júrgizbei otyrǵanyn málimdedi.
Gúlstan Qamit úndeýinde Prezidentke birneshe ótinish jasady.
"Birinshiden, Aqnár isi boiynsha tergeýdi Qylmystyq kodekstiń 99 jáne 121-baptary boiynsha qaita saralaý týraly nusqaý berýińizdi, ekinshiden, Almatydaǵy tergeý organdaryna senimsizdik bildire otyryp, isti Astana qalasynan arnaiy tergeý tobynyń baqylaýyna tapsyrýyńyzdy suraimyn. Úshinshiden, qyzymnyń ólimine qatysy bar kúdikti tulǵalardy qamaýǵa alýǵa jáne ádil tergeý júrgizýge yqpal etýińizdi suraimyn. Qurmetti Prezident myrza, ózińiz aitqandai elde zań ústemdigi ornasa, halyqtyń bilikke degen senimi nyǵaiady degen sózińizge tolyq senemin", - deidi Gúlstan Qamit.
Eske salaiyq, Almatyda 2024 jyly 20 shildede Aqnár Hamit kópqabatty turǵyn úidiń jetinshi qabatynan qulap, qaitys bolǵan. Tergeý bul oqiǵany "ózin-ózi óltirý" babymen tirkegen. Alaida jaqyndary Aqnárdiń jetinshi qabattan qulap ketkenine senbeidi. Olardyń sózinshe, marqum qaza tapqanǵa deiin denesinde azaptaý belgileri bolǵan.
