Oral qalasynda aqyn, ustaz, jubantanýshy Úzildik Eleýbaevamen keremet kezdesý ótti. Kesh keiipkeri – biyl 70 jasqa tolǵan bolatyn. «Eren eńbegi úshin» medaliniń iegeri, sanaly ómiriniń baqandai 42 jylyn urpaq tárbiesine arnaǵan ardager ustaz.
Buǵan deiin osyndai is-shara Juban Moldaǵaliev atyndaǵy oblystyq ámbebap- ǵylymi kitaphanada jáne Aqjaiyq aýdanynda ótken bolatyn. Oǵan qosa Qadyr saraiynyń ujymyna alǵysyn jetkizip, ómir joly, shyǵarmashylyǵy týraly sóz qozǵady.
Aqjaiyq eline abyroi men bedeli bar, áli de attan túspei aýyl-eldiń, qalaberdi qalalyqtardyń muńyn muńdap, joǵyn joqtap júrgen janǵa eldiń peiili erekshe.
BQO Mádeniet, tilderdi damytý jáne arhiv isi basqarmasy basshysynyń m.a T.Ǵabdýshev kesh iesin quttyqtap, estelik syilyq jasap, iyǵyna qazaqy naqyshtaǵy kiimdi japty.
Óz kezeginde Aqjaiyq aýdany ákiminiń orynbasary Baqbergen Ábýov te ustaz aqyndy aýdan basshylyǵy men aýdan halqy atynan quttyqtap, Úzildik Eleýbaiqyzynyń 70 jasyna arnalǵan is-sharalar jaz ailarynda da jalǵasatynyn atap ótti.
QR Eńbek sińirgen ártisi, ánshi-termeshi Sáýle Taýdaeva da Qadyr sahnasynda aqyn týraly jyly pikirlerin bildirse, Jazýshylar Odaǵynyń Oral filialy tóraǵasynyń orynbasary Marlen Ǵilymhan óńirdegi barsha qalamgerdiń sálemin jetkizip, gúl shoqtaryn tabys etti.
Shara barysynda kesh iesiniń sózine jazylǵan jáne basqa da taqyrypqa sai ánderdi Á.Qýanǵaliev, A.Bazarov, sonymen qatar "Áje sálemi" kvarteti shyrqap, belgili ánshi-kompozitor E.Aqbasov Qadyr Myrza Áliniń sózine jazylǵan "Ómir" atty ánin oryndady.
