Túrkistan oblysynyń Keles aýdandyq soty 24 jastaǵy aqyl-esi kem jigitti zorlady dep aiyptalǵan úsh aǵaiyndyǵa úkim shyǵardy. Olardyń árqaisysy 9 jylǵa bas bostandyǵynan aiyryldy, dep habarlaidy Dalanews.kz.
Oqiǵanyń mán-jaiy
Bul sumdyq jaǵdai týraly alǵash ret 2025 jyldyń naýryzynda “NeMolchi.kz” qory jariialaǵan bolatyn. Uiymnyń dereginshe, damýy 4 jastaǵy bala deńgeiinde dep baǵalanǵan jigit birneshe jyl boiy óz týystary men kórshileriniń zorlyǵyna ushyrap kelgen.
Jábirlenýshiniń anasy qylmysqa alty adamnyń qatysy bar ekenin, olardyń arasynda kámeletke tolmaǵandar da baryn málimdegen. Alaida sot aldynda tek úsh eresek týysy ǵana jaýapqa tartyldy.
Sot protsesi men úkim
Is jabyq rejimde qaraldy. Tergeý materialdaryna sáikes, eki aǵaiyndy birneshe ret top bolyp zorlaý (QR QK 121-baby 2-bóligi 1 jáne 4-tarmaqtary) boiynsha aiyptalǵan. Úshinshisi – toptyq zorlaý jáne urlyq (QR QK 121-baby 2-bóligi 1-tarmaǵy; 188-baby) baptarymen sottaldy.
Jábirlenýshiniń advokaty Gúlaihan Týrsýmanova Tengrinews.kz tilshisine bergen suhbatynda sot barlyǵyna toǵyz jyldan jaza taǵaiyndaǵanyn aitty.
«Eń bastysy – olardyń kinási dáleldenip, aiypty dep tanyldy. Bul jábirlenýshiniń anasy úshin eń mańyzdysy edi. Buǵan deiin prokýror suraǵan toǵyz jyl bizge tym jeńil jaza bolyp kóringen. Úkimge shaǵym túsirip, jazany kúsheitý máselesi anasynyń sheshimine bailanysty bolady», – dedi advokat.
Sondai-aq ol sottalǵandar jábirlenýshige 5 million teńge ótemaqyny birigip tóleýge mindettelgenin málimdedi.
Jańa ótinish berilmek
Jábirlenýshiniń anasy zorlyqqa taǵy úsh jergilikti turǵynnyń qatysy bolýy múmkin ekenin aitqan. Advokat Týrsýmanovanyń sózinshe, úkim zańdy kúshine engennen keiin olar bul adamdarǵa qatysty qaitadan aryz túsirmek. Buǵan deiin osy úsh adam boiynsha qozǵalǵan is toqtatylǵan edi.
