Almatylyqtardy selden qorǵaýǵa arnalǵan Aqsai bógetine qatysty bylyqtar áshkere boldy, - dep habarlaidy Dalanews.kz.
ProTenge telegram arnasy osy turǵyda zertteý júrgizgen. 22 milliard teńge bólingen bógettiń sapasy men salyný merzimine qatysty suraqtar týǵan.
Bógetti salýǵa qarjy pandemiia kezinde – 2020 jyly bólingen. Qurylysqa qatysty konkýrs jedeldetilgen túrde ótip ketken. Qurylys 2022 jyly bitýi kerek bolǵan.
Memlekettik sáýlet-qurylys baqylaýy basqarmasy qurylys jumystarynda buzýshylyqtar bolǵanyn anyqtaǵan. Zańbuzýshylyqtar aýyz toltyryp aitarlyqtai bolǵandyqtan "TOLAGAI -2050" JShS merdiger kompaniiasy qurylysty toqtatyp, artynsha kelisimshart joiylǵan. 2023 jyldyń tamyzynda bóget qurylysy toqtap turǵanyna bes aiǵa jýyqtaǵan kezde ony salýǵa tapsyrys bergen «Qazseldenqorǵaý» qurylys kompaniiasymen sottasqan. Telegram arna málimetinshe, 2022 jyldyń basynda Nazarbaeva Aqbota Bolatqyzy kompaniia quryltaishylarynyń biri bolǵan.
Aita keteiik, sóz bolyp otyrǵan bóget Almatydaǵy Naýryzbai aýdanynyń jáne Almaty oblysynyń quramyna kiretin Qarasai aýdanynyń turǵyndaryn selden qorǵaidy dep qarastyrylǵan. Aqsai ózeniniń basseini sel qaýpiniń birinshi sanatyna jatady, onyń joǵarǵy aǵysynda 18 sel qaýpi bar ýchaske, 25 muzdyq, 16 morenalyq jáne muzdyq kól bar.
