Quryltaı eshqashan toı toılaıtyn jıyn bolmaǵandyǵy taǵy dáleldendi. Ertede han ordasy bolǵan Saraıshyqtyń irgesindegi Atyraý oblysy qalyń qazaqty tolǵandyrǵan, eldik máseleler talqyǵa túsken orynǵa aınaldy. Áleýmettik, sharýashylyq, ıdeologıalyq jáne basqa da salalardaǵy baǵdarymyz aıqyndalyp, baǵytymyz júıelendi. Ult uıasy Ulytaý jerinde, odan keıin kıeli Túrkistanda ótken quryltaılarda eldiń saıası kelbetine qatysty mańyzdy bastamalar talqylansa, al tarıhı ólke – Atyraý alabynda ótip jatqan basqosýda jaqsylyqtyń joly – jańarý men jańǵyrýǵa qatysty jaıttar kóterildi.
Shyndyǵynda da, naǵyz damyǵan el bolý úshin ekonomıkalyq maqsat qoıý azdyq etetinin ýaqyt ózi kórsetip otyr. Eń aldymen sana-sezimimiz jańǵyrýy qajet, halqymyzdyń dúnıetanymy men ómirlik ustanymy ózgerýi tıis. Jáne bul ózgerister rýhanı qundylyqtarǵa negizdelgeni abzal. Úshinshi otyrystyń Ulyq ulystyń, keıin Qazaq handyǵynyń mańyzdy ákimshilik jáne saýda ortalyǵy bolǵan Jaıyq jaǵasynda ótip jatqany da osy maqsattan. Mádenıet pen rýhanıat, azamattyq qoǵam, bilim-ǵylym jáne áleýmettik salaǵa serpilis ákelýdiń jaı-japsary qaralǵan alǵashqy kúninen-aq bul otyrystyń mańyzdylyǵy aıqyndala tústi. Aldyńǵy quryltaıda kóterilgen dúnıeler taǵy bir ekshelenip, aıryqsha mańyzǵa ıe boldy. Prezıdentimiz óz sózin «Jańarý men jańǵyrý – jaqsylyqqa jol ashady» dep bastaýy da qalyń qarashanyń oıyn salmaqtaı tústi. Dili men tili, sanasy men rýhy adasyp júrgen jastarǵa aqyl aıtar aǵa býynnyń birin-biri moıyndap, qurmet kórsete bilýi ultymyzdyń yntymaq-berekesin arttyra túseri sózsiz ekendigi aıtyldy. Memleket basshysy osy máseleniń sebebin aıtyp, jiktep, jiliktep berdi. El aǵalarynda aýyzbirshilik bolsa, urpaqtyń boıynda el súısiner kesek qasıetter qalyptasary daýsyz.
Aqan ÁBDÝÁLIEV, Qazaqstannyń Eńbek sińirgen qaıratkeri, Jambyl atyndaǵy qazaq memlekettik akademıalyq fılarmonıasynyń dırektory
