Aqtaý mańynda apatqa ushyraǵan ushaqtyń qara jáshigindegi material Qazaqstanǵa jetkiziletini belgili boldy. Qazaqstannyń Kólik ministrligi bul aqparatqa qatysty pikir bildirdi, dep habarlaidy Dalanews.kz.
Ministrlik málimetinshe, aldaǵy kúnderi Astanaǵa aviatsiialyq oqiǵany tergeý jónindegi komissiia músheleriniń borttyq ózdiginen jazǵyshtardan (qara jáshikterden) alynǵan materialdarmen keledi dep kútilip otyr.
Kelgen soń sarapshylar borttyq ózdiginen jazǵyshtardan alynǵan derekterdi dereý zerdeleýge kirisedi.
Buǵan deiin Braziliiada Aqtaýda apatqa ushyraǵan ushaqtyń qara jáshikterin taldaý aiaqtalǵany habarlanǵan bolatyn.
Braziliialyq BAQ-tyń málimetinshe, eldiń áýe kúshteri Embraer ushaǵynyń qara jáshikterin taldaýdy aiaqtap, materialdardy Qazaqstanǵa jiberedi. Materialdy Braziliianyń úsh tergeýshisi, sondai-aq Ázerbaijan men Reseidiń agentteri taldaǵan.
Apatty taldaýǵa jáne tergeýge jaýapty mekeme qara jáshiktegi materialdardy qazaqstandyq aviatsiialyq apattardy tergeý organyna jiberedi jáne apat týraly qorytyndy esep jariialanady.
Aita keteiik, 2024 jyly 25 jeltoqsanda jergilikti ýaqyt boiynsha 11.30-da Aqtaý mańynda Bakýden Groznyiǵa ushyp bara jatqan ushaq apatqa ushyrady. Bul - Azerbaijan Airlines áýekompaniiasyna tiesili Embraer 190 ushaǵy.
Aqparat boiynsha ushaq bortynda 67 adam, onyń ishinde 5 ekipaj múshesi bolǵan.
Apattan 6 qazaqstandyq kóz jumdy. Jalpy qaza tapqandar sany — 38. Qaiǵyly oqiǵadan 29 adam aman qaldy.
Qaiǵyly oqiǵadan keiin Ázerbaijanda Jalpyulttyq aza tutý kúni jariialandy. Túste búkil el boiynsha memlekettik týlar túsirilip, kólikter toqtady. Ázerbaijandyqtar qaza tapqandardy bir minýt únsizdikpen eske aldy.
Keiinirek Chikago konventsiiasynyń 13-qosymshasyna sáikes Qazaqstan Ázerbaijan men Reseidiń aviatsiialyq organdarymen aqyldasqan soń, QR Kólik ministri Marat Qarabaev basqaratyn komissiia Embraer ushaǵynyń qara jáshigin Braziliiadaǵy CENIPA ortalyǵyna jiberý týraly sheshim qabyldady.
