Flydubai kompaniiasynyń "Boing" ushaǵy 19 naýryzǵa qaraǵan túni Dondaǵy Rostov qalasynyń áýejaiyna qonbaq bolǵanda apatqa ushyraǵan edi. Borttaǵy 62 adamnyń bári qaza tapty.
Búgin tergeý oryndaryndaǵy derekkózge súiengen «Kommersant» basylymy Flydubai áýe kompaniiasyna qarasty ushaq ekipajy músheleriniń arasynda apattan birer minýt buryn janjal týǵany týraly habarlady.
Basylymnyń dereginshe, «qara jáshikti» ashqan sarapshylar ushqyshtar ekinshi márte qonýǵa áreket jasaǵan kezde avtopilotty óshirgenin anyqtady. Pilottardyń biri manevr kezinde qatelik jasap, onyń áriptesi shtýrvaldy ózine tartqanda olardyń arasynda kelispeýshilik bolǵan. Basqarýshy ushqysh shtýrvaldy ózine tartqanda, ekinshi ushqysh «Toqta! Qaida?! Olai isteme!» dep aiqailap óz shtýrvalyn keri basqan. Nátijesinde «Boing» kompiýterine eki ushqyshtan birdei áreket etýge buiryq beretin elektr imýplsteri túskendikten, ushaqty basqarý tártibi buzylǵan. Ekipaj ushaqtyń qulap bara jatqanyn kesh bilgendikten, ushaq jerge saǵatyna 325 shaqyrym jyldamdyqpen qulaǵan. Gazet pilottardyń «úrei men ashynýdan» birneshe sekýnd aiǵailaǵanyn jazady.
Flydubai áýe kompaniiasynyń ushaǵy Dýbai men Dondaǵy Rostov baǵytynda ushqan. Ol 19 naýryzǵa qaraǵan túni qiyn aýa-raiy jaǵdaiynda ekinshi márte qonbaqshy bolǵan kezinde apatqa ushyrady.
