Tanymal ánshi Qaraqat Ábildina jelidegi paraqshasynda jańa video jariialady, dep habarlaidy dalanews.kz.
"Búgin bizdiń úige ABK-nyń serileri at basyn tiredi… Bul azamattardy tanyǵanyma biyl týra 30 jyl eken. ABK tobynyń qurylǵanyna da — 30 jyl. Sol ýaqyttyń, sol ortanyń, sol bir ádemi kezeńniń kýási bolǵanyma óte qýanyshtymyn. ABK-nyń ánderimen stýdenttik shaǵym ótti. Olardy kórgen saiyn kóz aldyma bal-bul jainaǵan 18 jasym keledi… Arman kóp, ýaiym az, kóńil alańsyz kez. Qandai shaqtar edi…
Búgin dastarqan basynda otyryp, sol kúnderdi bir-birlep eske aldyq. Birge júrgen dostarymyzdy aittyq. Bir kúldik, bir kúrsindik… Medeýdiń kelinshegi Aigúl marqumdy eske aldyq. Aigúlmen týǵan abysyndardai jaqyn aralastyq. Jany sondai jaqsy adam edi… Ókinishke qarai, ǵumyry qysqa boldy. Imany joldas, jany jánnatta bolsyn! Kórmegen jaqsylyǵyn artynda qalǵan ul men qyzyna kórý buiyrsyn!
Al Erlan men Anar eki ret quda-qudaǵi atanyp úlgerdi. Eń qyzyǵy – qos qyzy bir úidiń kelinderi, abysyndar eken. Ómir degen qandai qyzyq?!.. Keshe ǵana bizdiń úilený toiymyzda meniń toi kóilegimniń etegin ustap júrgen 4-5 jastaǵy Aikamyz bir áýlettiń úlken kelini atanyp otyr. Qyzdarymyzdyń barǵan jerinde baǵy janyp, baqyttary baiandy bolsyn!
30 jyl… Osy bir sannyń ishinde qanshama ómir jatyr deseńizshi. Jastyq shaq, dostyq, án, arman, qýanysh, saǵynysh… Birge júrgen adamdardyń árqaisysy ómirińniń bir bólshegine ainalyp ketedi eken. Búgin ýaqyt bizdi bir keshke baiaǵy jastyǵymyzǵa qaita aparǵandai boldy.
Adam keide ótken kúnderdi emes, sol kúnderdegi ózin, janyndaǵy adamdaryn, alańsyz kóńilin saǵynady eken… Biz Astanada, sizder Almatyda. Aman júrgenimizde osylai bas qosyp, ótkendi kúlip eske alyp, bir-birimizdiń qadirimizdi bilip júreiikshi. Ómirdiń eń qymbat bailyǵy — jyldar ótse de jylýy joǵalmaityn adamdar men júrekte qalǵan estelikter eken…" – dep jazdy Qaraqat Ábildina.
