Ánshi Sivi Mahmýdidiń burynǵy kúieýi Ańsar Qajmuhanuly alaiaqtyq jasaǵanyn moiyndady, dep habarlaidy Dalanews.kz.
Ańsar Qajmuhanuly sotta prokýratýramen mámilege kelip, kinásin moiyndaýǵa daiyn ekenin málimdedi. Oǵan asa iri kólemde alaiaqtyq jasady degen aiyp taǵylyp otyr.
Sot Qajmuhanulynyń ótinishin qanaǵattandyryp, kelisimge qol qoiýǵa ýaqyt berdi. Kináni moiyndaý jáne ókiný jazany jeńildetýi múmkin.
14 naýryzda Astanada ánshi Sivi Mahmýdidiń burynǵy baiy Ańsar Qajymuqanulyna qatysty sot otyrysy bastalǵan bolatyn. Ol asa iri kólemde alaiaqtyq jasady dep aiyptalyp otyr.
Ázirge istiń egjei-tegjeii tolyq emes, dei turǵanmen Nege-degi áriptester Ańsardyń aty atalǵan qylmystyq istiń mán-jaiyna úńilýge tyrysypty. Áńgime 50 myń dollar jaiynda.
Esterińizde bolsa, byltyr Ulytaý oblysynda ǵylymi-ádistemelik ortalyq qyzmetkerlerine qatysty "senip tapsyrylǵan múlikti iemdený" faktisi boiynsha is qozǵalǵan.
Tergeý amaly kezinde, basqa bir bylyqtyń beti ashylǵan edi. Ortalyqtyń bas buǵaltyry esirtkimen ustalǵan qyzynyń jazasyn jeńildetý úshin elordalyq páltseilerge para usynǵany áshkere bolǵan.
Sotta bas buǵaltyr kinásin tolyq moiyndady. Aitýynsha, qyzy ótken jyldyń 28 naýryzynda ustalypty. Onyń esirtki saqtaǵany jáne ony saýdaǵa shyǵarýǵa tyrysqany dáleldengen.
Anasy úreilenip, tanys-tamyr arqyly "máseleni sheshetin" adam izdestire bastamai ma... Mine, sol kezde onyń týysynyń kúieýbalasy 50 myń dollarǵa "máseleni jaýyp tastaýǵa" ýáde bergen. Áiel bul somany eki bólip tólegen. Biraq ýáde oryndalmaǵan, istiń babyn jeńildetý múmkin bolmaǵan.
Endi eń qyzyǵy...
Buǵaltyr áielge ýáde bergen adam Sivi Mahmýdidiń burynǵy baiy - Ańsar Qajymuhanuly bolǵan. Aitýynsha, Ańsar "bul sharýany yń-shyńsyz sheship tastaimyz" dep sendirgen. Istiń aiaǵy suiylyp ketkesin, buǵaltyr áiel qarjyny qaitarýdy talap etken.
Alaida Ańsar Qajymuhanuly ýáde etilgen 50 myń dollardyń tek 28 myńyn ǵana qaitarǵan.
Tergeý málimeti boiynsha, Sividiń burynǵy baiynda Astanadaǵy Almaty aýdanynyń politsiia bóliminde eshqandai tanys-tamyry bolmaǵan. Alǵan qarajatty jeke basynyń paidasyna jaratyp jibergen.
Túneýkúni jýrnalist Anna Danchenkoǵa suhbat bergen Sivi Mahmudi burynǵy kúieýinen kórgen qorlyǵyn aityp, ekran aldynda kóz jasyn kóldetken edi. Ánshi óziniń qaýipsizdigi úshin basqa qalaǵa kóshýge májbúr bolǵanyn da málimdegen.
