Qazaqstannyń minoritarlyq aktsionerler qaýymdastyǵynyń (QAMS-tyń) atqarýshy direktory Daniiar Temirbaev bazalyq mólsherlemeni tómendeteiik dep júrgenderge saýatty túrde jaýap qatty. Ol "erdoǵanomikanyń" kesirinen Túrkiianyń búgin qandai kúige túskenin aityp, Úkimetke "halyq ekonomisteri symaqtardyń" jeteginde ketpeýdi eskertti, dep jazady Dalanews.kz.
"Kúni keshe Resei ortalyq bank basshysy áskeri adamsha kesip aitty. Eger aqsha-nesie saiasatyn jumsartsaq, "infliatsiia aldynda kapitýliatsiia" bolady, - dedi. Iaǵni, basty mólsherlemeni tómendetken jaǵdaida (qazir olarda - 21%, Qazaqstanda - 15.25%). Elvira Nabiýllina ne aitatynyn jaqsy biletin adam. Reseide de bul rette túrli usynystar aitylyp jatady. Máselen, infliatsiialyq targetteýden bir jola bas tartaiyq (infliatsiiamen kúresý) degendei. "Stavkany tómendetsek boldy, biznestiń qaǵanaǵy qaryq, saǵanaǵy saryq bolady", - deidi popýlister baiaǵy. Reseidiń ortalyq bankine aýyq-aýyq barlyq taraptan osyndai qysym jasalyp turady. Biraq Nabiýllina hanymǵa, bizdiń Ulttyq bank basshysy Timýr Súleimenovke qaraǵanda, óz ustanamyn (solai bolýy da kerek) qorǵaý áldeqaida ońai. Iaǵni, ol kisi óz degeninen qaitpaidy. Nege bulai? Jalpy, Elvira Nabiýllinanyń bul laýazymǵa kelgenine 11 jyldan astam ýaqyt bolypty (2013 jyldyń maýsymynan bastap). Ári prezidentiniń tolyqtai qoldaýyna, senimine ie. Al bizdikiler she? Nabiýllina óz laýazymynda otyrǵan merzimde Qazaqstanda Ulttyq banktiń bes tóraǵasy aýysypty. Al jii-jii aýys-túiis jaǵdaiynda basshynyń táýelsiz bolýy ekitalai", dep jazady qarjyger Facebook-tegi paraqshasynda.
Onyń aitýynsha, qarjylyq retteýshi organnyń táýelsiz bolýy - eldiń qarjy júiesindegi naryqtardyń oǵan senim bildirýinde mańyzdy sharty bolyp tabylady.
"Ortalyq bank saiasatkerlerdiń aidaǵanyna kónip, aldynda qurdai jorǵalasa (ásirese popýlistik urandarǵa), ekonomikanyń túbine jetken degen sol bolady. Áne, Túrkiiany qarańyzdar, ne bolyp jatqanyn? Ortalyq bank Erdoǵannyń qas-qabaǵyna qarap, uzaq ýaqyt boiy infliatsiiany tómendetýmen keldi. Tipti, bul rette "erdoǵanomika" degen saiasi termin de bar. Iá, sol "erdoǵanomikanyń" kesirinen Túrkiia eki sannan turatyn paiyzdyq infliatsiiaǵa jáne túrik lirasynyń ońbai quldyraýyna tap keldi. Áýpirimdep júrip, áiteýir esterin jiǵany durys boldy. Bizdiń elimizde de "erdoǵanomika" saiasatynyń jaqtastary bar: stavkany tómendeteiik, infliatsiia máselesimen keiinirek ainalysaiyq deitinder. Bulai jumys jasalmaidy, sony durystap túsinip alyńyzdar. Infliatsiiany eske alǵan kezde mundaida bári kesh bolady. Qazaqstannyń ekonomikasyna, qarjy sektoryna úlken zalal kelip, oǵan degen senimniń joǵalýy elimizdi birneshe jylǵa (múmkin ondaǵan jyldarǵa) artqa "laqtyrady", dep sózin tolyqtarady maman.
Onyń aitýynsha, basty (bazalyq) mólsherleme - infliatsiianyń kórinisi.
"Eger betin qisyq bolsa, ainaǵa ókpeleme deýshi me edi? Eger infliatsiia joǵary bolsa, onda mólsherleme de solai bolady. Sondyqtan bul arada bazalyq mólsherlememen emes, infliatsiiamen kúresý kerek. Áitpese, Túrkiianyń kúiin keshemiz. Al eger infliatsiiamen kúrespese ne bolady? Eger Qazaqstan Úkimeti "halyq ekonomisteri symaqtardyń" jetegine ketse she? Mundaida "infliatsiia aldyndaǵy kapitýliatsiia" degen "kóshe demokratiiasy" ispetti sipatqa ie bolady. Iá, infliatsiianyń KEDEILIKKE SALYNǴAN SALYQ dep atalýy kezdeisoqtyq emes. Odan, eń aldymen, halyqtyń áleýmettik osal toptary zardap shegedi. Sondyqtan joǵary infliatsiia árqashan áleýmettik narazylyq pen kúizelistiń habarshysy bolyp tabylady", dep sózin qorytyndylaidy Daniiar Temirbaev.
Aita ketsek, Ulttyq bank 29 qarashada bazalyq mólsherlemeni 14,25-ten birden 15,25%-ke deiin kóterdi. Mundaidy Úkimet músheleri men qarjygerler qaýymy da kútpedi. Kóbisi bazalyq mólsherleme burynǵy qalpynda qaldyrylady desse, keibiri onyń kóteriletinin boljady, biraq birden 1%-ǵa emes.
