Amerikalyq kókparshy Nik Ýillerttiń osy kúzde Astana qalasynda ótetin 5-shi Dúniejúzilik kóshpendiler oiyndary aiasyndaǵy kókpar saiysyna daiyndyǵy áleýmettik jelide kóptiń nazaryna tústi.
Kókparshy daiyndyq barysynda serkeniń ornyna gir tasyn paidalanyp, al jylqyny qoldan jasalǵan aǵash atqa almastyrǵan. Beinetaspa Ulttyq sport qaýymdastyǵynyń Instagram jáne Tik Tok (https://www.instagram.com/reel/C-pavNVsI-b/?igsh=eXppcnN5d2t1cHVw jáne https://vm.tiktok.com/ZMrnm5Npp/), áleýmettik jelilerine jariialanǵan edi.
Video 150 myńnan astam qaralym jinap, kóptiń nazaryna tústi. Jeli qoldanýshylary kókparshyny qoldap, sáttilik tiledi.
Aita keteiik, Nik Ýillert – kókpardan AQSh quramasynyń sportshysy, osy kúzde Astanada ótetin 5-shi Dúniejúzilik kóshpendiler oiyndarynda kókpar jáne aýdaryspaq (at ústindegi kúres) sporty boiynsha baq synamaq.
Sonymen qatar, Ýillert kókpardan basqa shańǵy, serfing jáne MMA sportymen shuǵyldanady.
«2018 jyly AQSh quramasynyń qatarynda kókbóri sportyna jáne at ústindegi kúreske qatysqan alǵashqy amerikalyq boldym. Al Dúniejúzilik kóshpendiler oiyndarynda kásibi sportshylarmen básekege túsý múmkindigine ie bolǵanyma óte qýanyshtymyn. Minekei, meniń Qazaqstanǵa barsam degen armanym oryndalmaq.
Talai ýaqyttan beri bul mekenge saiahattaýdy josparlap edim, endi osy múmkindik úshin alǵys aitqym keledi. Árine, kópshilik AQSh sportshylaryn kókpar men at ústindegi kúreste ońai qarsylas sanaýy múmkin. Dese de bar múmkinshiligimizdi kórsetip, deńgeiimizdiń óskenin dáleldei alamyz dep oilaimyn», - dep atap ótti sportshy.
Amerikalyq kókparshy buǵan deiin 2018 jylǵy Dúniejúzilik kóshpendiler oiyndarynda jáne 2020 jyly kókbóri sportynan chempionatta óner kórsetip úlgergen.
Kókpar básekesi 5-shi Dúniejúzilik kóshpendiler oiyndary aiasynda 9-12 qyrkúiek aralyǵynda «Qazanat» ippodromynda ótedi.
Eske sala keteiik, Respýblikalyq «Kókpar» federatsiiasy Qazaqstan Respýblikasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Báige», «Sadaq atý», «Teńge ilý», «Aýdaryspaq», «Jamby atý», «Qusbegilik», «Asyq atý», «JORYQ» at sporty jáne t.b. federatsiialar bar. QR Ulttyq sport qaýymdastyǵyn Islambek Saljanov basqarady.
Atap óteiik, 8-13 qyrkúiekte Astana qalasynda 5-shi Dúniejúzilik kóshpendiler oiyndary ótedi. Is-sharaǵa 89 elden 2000-nan astam sportshy qatysady dep josparlanýda. 5-shi Dúniejúzilik kóshpendiler oiyndarynyń Bas demeýshisi - ALAGEUM ELECTRIC, Oiyndardyń Bas seriktesi - Halyk Bank. Astanada ótetin Dúniejúzilik kóshpendiler oiyndarynda barlyǵy 21 sport túrinen 97 medal jiyntyǵy sarapqa salynady.
