Bilim men ǵylym – el bolashaǵyn damytatyn eń mańyzdy kúshterdiń biri. Álem kún saiyn damyp, túrli jańalyqtarymen ómirge ózgeris alyp kelip jatqanda jastardyń aqparattan tys qalýy durys emes. Elimizde, shetelde damýdyń múmkindikterin izdestirip, olardy paidalaný mańyzdy. Qazirgi tańda kóptegen talantty jastar shetelde oqý múmkindiginen habarsyz nemese senimsiz. Qajetti qujattardy jinastyrý, emtihan túrlerin tapsyrý, oqýǵa ketetin qarjy máselesi – bári de úlken qiyndyq bolyp kórinedi.
Osyndai múmkindikterge qol jetkizýge kómektesetin, baǵyt-baǵdar kórsetetin jandardyń róli erekshe. Solardyń biri – ǵylym jolynda tek ózi ǵana emes, elimizdiń ǵalymdary men kásibi mamandaryn Amerikaǵa oqýǵa shaqyryp, bilim men damýdyń jolyn kórsetip júrgen qazaqtyń batyr qyzy – Lira Qonys. Lira túrli keńester berip, baǵdarlamalar týraly aqparat taratyp, jastarǵa senim berip júr. Eń bastysy – onyń eńbegi jastar úshin jańa múmkindikterdiń esigin ashýda. Onyń kómegimen kóptegen ǵalymdar sheteldik ýniversitetterge túsip, taǵylymdamadan ótip, óz bilimin jetildirýde.
Amerikaǵa qonys aýdarǵan Liranyń otbasy – búginde bilim men biliktiliktiń shynaiy úlgisine ainalyp otyr. Ózi de, jubaiy da muhittyń arǵy betinde shyńdalyp, bilim men órkeniettiń ozyq úlgilerin úirengen. Olardyń joldaryn qýyp, bilimin shyńdaǵan tuńǵyshtary AQSh-tyń bedeldi ýniversitetinde tolyq grant iegeri atanyp, oqyp jatyr. Alaida Lira tek óz otbasynyń qamyn oilaýmen toqtaǵan joq. Kózi ashyq, kókiregi oiaý adamnyń naǵyz úlgisin kórsetip, ol qazaq jastarynyń álemdik bilim ortalarynda oqýǵa jol ashýda. Atap aitqanda, «Bolashaq» baǵdarlamasymen tyǵyz bailanys ornatyp, Devistegi Kaliforniia ýniversitetiniń esigin otandyq ǵalymdar men mamandar úshin aiqara ashty. Bul – jeke jetistiktiń ulttyq múddege qyzmet etýiniń jarqyn kórinisi.
Shetel kórgen mamannyń bilimmen qatar, ómirlik tájiribe jinaityny da belgili. Kaliforniiadaǵy Devis ýniversitetindegi ǵalymdardy sabaqtan tys ýaqytta Amerika eliniń mádenietimen tanystyrý úshin túrli mádeni oryndar men is - sharalarǵa alyp barady. Bul bastama da Liranyń qoldaýymen oryndalyp jatyr. Salystyrý bolǵan jerde elimizge ne qajet ekeni, neniń durys nemes burys ekenin túsinetin bolady. Bul tek jeke adamdardyń jetistigi emes, bolashaqta eldiń damýyna qosatyn úlesi. Sheteldiń mádenietin kórgen maman – erteń óz elinde bilikti maman, jańashyl tulǵa bolýmen qatar mádeni transformatsiia jasaýy múmkin. Osyndai múkindik bergen Bolashaq baǵdarlamasynyń da orny erekshe.
«Bolashaq» halyqaralyq baǵdarlamasynyń maqsaty — tek jeke mamandardyń diplomyn ielenýi emes, sol bilim arqyly tutas qoǵamnyń sapalyq deńgeiin kóterý, ulttyq ǵylymnyń kókjiegin keńeitý. Memleket usynyp otyrǵan bul múmkindik — intellektýaldy ult qalyptastyrý jolyndaǵy strategiialyq qadam, sondyqtan Lira siiaqty otandastarymyz salǵan sara jolmen júrý, álemdik ozyq tájiribeni el qajettiligine jaratý árbir mamannyń azamattyq paryzyna ainalýy tiis.
Shetelde bilim alýshylar bilim men tehnologiiany eksporttap qoimai, sol arqyly otandyq ortanyń mádenietin, ekonomikasyn jáne ǵylymi áleýetin jańa deńgeige kóterýdi maqsat etedi. Sondyqtan Bolashaq baǵdarlamasynyń tapsyrmasyn Amerikada oryndap júrgen qazaq qyzy talai qazaq ǵalymyna jaǵdai jasap keledi. Amerikaǵa jol ashqan altyn kópirdi árbir ǵalym men maman óz kásibi biliktiligin jetildiretin ári el damýyna úles qosatyn taptyrmas múmkindik dep qabyldaýy qajet.
