Oljas Súleimenov biozerthananyń qurylysy jaily kezdeisoq bilgen. Auyn mundai sheshim jurtshylyq talqylaýynsyz qabyldanǵanyna qatty tańǵalypty.
– Mundai zerthana bizge ne úshin kerek? Adamzat úshin óte qaýipti zattar qoimasy. Eger qalasa, bul isti Amerikada júzege asyrsyn. Al biz baqylaiyq. Ne úshin? Biz muny suradyq pa? Álde dál osy synaqty Qazaqstanda júrgizýge qajettilik bar ma? Buryn iadrolyq qarýdy qyryq jyl qatarynan synady, al endi osyny synap kórmekshi, – dedi.
Oljas Súleimenov asa qaýipti virýs shtammdaryn saqtaý jáne zertteý josparyna alańdaitynyn atap ótti.
– Men bizdiń Úkimet pen el basshylyǵyn halqymyzdyń ómiri men ar-namysyna tietin mundai dúnielerge muqiiat qaraýǵa shaqyramyn, – dep atap ótti qoǵam qairatkeri.
Súleimenov budan keiin de biologiialyq zerthana qurylysyna qarsylyǵyn bildiretinin málimdedi. Onyń pikirinshe, zerthana qazaqstandyqtardyń ómiri men densaýlyǵyna qaýip tóndiredi.
– Bizdiń «Nevada-Semei» qozǵalysynyń halyqtyń ómirine qaýipti qubylystarǵa kúres tájiribesi bar. Úsh onjyldyq buryn qazaqstandyqtar alǵash ret óz ómirin qorǵady. Qorǵap ta qaldy. Qazaqstan halqy – osy jerde ómir súrip jatqan adamdar ǵoi, bolashaqqa úmitpen qaraidy... Biz jarlyq shyǵara almaimyz, tyiym sala almaimyz. Biraq biz osy aktsiiaǵa qarsy shyǵa alamyz, – dep túiindedi sózin Oljas Súleimenov.
Eske salsaq, «Ashyq NQA» portalynda Jambyl oblysy aýmaǵynda qaýipti jáne asa qaýipti shtammdar saqtalatyn sheteldik biozerthana salynatyny týraly aqparat jariialandy. BSL-4 zerthanasynyń deńgeii – qaýiptiliktiń eń joǵary deńgeii.
Úkimet qaýlysy jobasyn qoǵamdyq talqylaý 19 qarashada aiaqtaldy. Saǵat 18:00-degi jaǵdai boiynsha jobany eki adam qoldaǵan, 426 adam qarsy shyqty. Sonymen qatar qazaqstandyqtar joba astyna 762 pikir qaldyrdy. Olar biologiialyq zerthananyń qurylysyna qarsy.
