ولجاس سۇلەيمەنوۆ بيوزەرتحانانىڭ قۇرىلىسى جايلى كەزدەيسوق بىلگەن. اۇىن مۇنداي شەشىم جۇرتشىلىق تالقىلاۋىنسىز قابىلدانعانىنا قاتتى تاڭعالىپتى.
– مۇنداي زەرتحانا بىزگە نە ءۇشىن كەرەك؟ ادامزات ءۇشىن وتە ءقاۋىپتى زاتتار قويماسى. ەگەر قالاسا، بۇل ءىستى امەريكادا جۇزەگە اسىرسىن. ال ءبىز باقىلايىق. نە ءۇشىن؟ ءبىز مۇنى سۇرادىق پا؟ الدە ءدال وسى سىناقتى قازاقستاندا جۇرگىزۋگە قاجەتتىلىك بار ما؟ بۇرىن يادرولىق قارۋدى قىرىق جىل قاتارىنان سىنادى، ال ەندى وسىنى سىناپ كورمەكشى، – دەدى.
ولجاس سۇلەيمەنوۆ اسا ءقاۋىپتى ۆيرۋس شتاممدارىن ساقتاۋ جانە زەرتتەۋ جوسپارىنا الاڭدايتىنىن اتاپ ءوتتى.
– مەن ءبىزدىڭ ۇكىمەت پەن ەل باسشىلىعىن حالقىمىزدىڭ ءومىرى مەن ار-نامىسىنا تيەتىن مۇنداي دۇنيەلەرگە مۇقيات قاراۋعا شاقىرامىن، – دەپ اتاپ ءوتتى قوعام قايراتكەرى.
سۇلەيمەنوۆ بۇدان كەيىن دە بيولوگيالىق زەرتحانا قۇرىلىسىنا قارسىلىعىن بىلدىرەتىنىن مالىمدەدى. ونىڭ پىكىرىنشە، زەرتحانا قازاقستاندىقتاردىڭ ءومىرى مەن دەنساۋلىعىنا ءقاۋىپ توندىرەدى.
– ءبىزدىڭ «نيەۆادا-سەمەي» قوزعالىسىنىڭ حالىقتىڭ ومىرىنە ءقاۋىپتى قۇبىلىستارعا كۇرەس تاجىريبەسى بار. ءۇش ونجىلدىق بۇرىن قازاقستاندىقتار العاش رەت ءوز ءومىرىن قورعادى. قورعاپ تا قالدى. قازاقستان حالقى – وسى جەردە ءومىر ءسۇرىپ جاتقان ادامدار عوي، بولاشاققا ۇمىتپەن قارايدى... ءبىز جارلىق شىعارا المايمىز، تىيىم سالا المايمىز. ءبىراق ءبىز وسى اكسياعا قارسى شىعا الامىز، – دەپ تۇيىندەدى ءسوزىن ولجاس سۇلەيمەنوۆ.
ەسكە سالساق، «اشىق نقا» پورتالىندا جامبىل وبلىسى اۋماعىندا ءقاۋىپتى جانە اسا ءقاۋىپتى شتاممدار ساقتالاتىن شەتەلدىك بيوزەرتحانا سالىناتىنى تۋرالى اقپارات جاريالاندى. BSL-4 زەرتحاناسىنىڭ دەڭگەيى – قاۋىپتىلىكتىڭ ەڭ جوعارى دەڭگەيى.
ۇكىمەت قاۋلىسى جوباسىن قوعامدىق تالقىلاۋ 19 قاراشادا اياقتالدى. ساعات 18:00-دەگى جاعداي بويىنشا جوبانى ەكى ادام قولداعان، 426 ادام قارسى شىقتى. سونىمەن قاتار قازاقستاندىقتار جوبا استىنا 762 پىكىر قالدىردى. ولار بيولوگيالىق زەرتحانانىڭ قۇرىلىسىنا قارسى.
