Memleket basshysynyń «Bolashaqqa baǵdar: rýhanı jańǵyrý» baǵdarlamasyn júzege asyrýǵa baǵyttalǵan «Aýylym – altyn besigim» atty aýyldyq mádenıet úıleri men klýbtary arasynda ótken oblystyq konkýrstyń júldegerleri keshendi dybys aparatýralary men árqaısysy 300 myń teńgeden aqshalaı syılyqqa ıe boldy. Marapattaý saltanaty Taldyqorǵan qalasyndaǵy İ. Jansúgirov atyndaǵy Mádenıet saraıynda ótti. Jeńimpazdardy oblys ákimi Amandyq Batalov quttyqtady, – dep habarlaıdy Almaty oblysy ákiminiń baspasóz qyzmeti.



– Halqymyzdyń mádenı ál-aýqatyn arttyrmaı, tolyqqandy el bolý qıyn. Barlyq ónerdiń bastaýyna aınalǵan aýyl mádenıetiniń bolashaǵy – qazaq eliniń rýhanı kemeldenýi. Sol sebepti aýyl jurtshylyǵyna degen kómegimizdi aıamaı, qoldaý tanytý – bizdiń basty mindetimiz. Jyl saıyn ótetin Mádenıet kúnderin ótkizý formaty bıyl ózgertilip, aýyldyq mádenıet úıleri men klýbtary qamtyldy. Bul baıqaýǵa 33 mádenıet nysany qatysty, olardyń barlyǵyna da syılyqtar beriledi. Ár aýylda, árbir eldi mekende úlkender úshin de, jastar úshin de klýbtardyń, mádenıet úıleriniń bolǵany mańyzdy. Sol maqsatta jumys júrgizip kelemiz. Oblystaǵy mádenıet nysandarynyń kúrdeli jóndeý jumystary men jobalyq-smetalyq qujattaryn ázirleýdiń ózine ǵana 1,1 mlrd. teńge bólindi. Aldaǵy ýaqytta da birlesip atqarǵan isterimiz jemisti bolsyn! Mádenıetimizdi, baǵa jetpes ónerimizdi nasıhattaý jolyndaǵy eńbegimiz eselene bersin, – dedi quttyqtaý sózinde oblys ákimi A. Batalov.

Baıqaý qorytyndysy boıynsha 8 aýyldyq mádenıet úıi jeńimpaz dep tanylyp, árqaısysyna 300 myń teńgeden aqshalaı syılyq sertıfıkaty men keshendi dybys aparatýralary berildi.

Saltanatty rásim barysynda qatysýshylardyń barlyǵy da marapattalyp, syılyqtarǵa ıe boldy. Máselen, 10 aýyldyq mádenıet úıi men klýbtarǵa dybys aparatýrasy syıǵa tartylsa, qalǵan 15-ine  kompúterler tartý etildi. Sóıtip, konkýrstyń barlyq qatysýshylaryna mádenıet nysandarynyń jumysyn jaqsartýǵa, materıaldyq-tehnıkalyq bazasyn nyǵaıtýǵa baǵyttalǵan syılyqtar berildi.

Shara barysynda konkýrsqa qatysýshylardyń úzdik nómirlerinen daıyndalǵan gala-konsert usynylady.

Atap ótsek, Almaty oblysynda 563 mádenıet nysany men arhıv bar. Bıylǵy jyly mádenıet salasynyń búdjeti 8,3 mlrd. teńgeni qurady. Qazirgi kezde Sarqan aýdandyq mádenıet úıi, Jambyl aýdany Myńbaev aýylyndaǵy, Sarqan aýdany Baqaly aýylyndaǵy aýyldyq mádenıet úıleri, Taldyqorǵan qalasyndaǵy memlekettik arhıv ǵımaratyna kúrdeli jóndeý júrgizilip, sol sıaqty 5 mádenıet nysanynyń jóndeý jumystarynyń jobalyq-smetalyq qujattary daıyndalýda.



 

Almaty oblysy ákiminiń baspasóz qyzmeti