– حالقىمىزدىڭ مادەني ءال-اۋقاتىن ارتتىرماي، تولىققاندى ەل بولۋ قيىن. بارلىق ونەردىڭ باستاۋىنا اينالعان اۋىل مادەنيەتىنىڭ بولاشاعى – قازاق ەلىنىڭ رۋحاني كەمەلدەنۋى. سول سەبەپتى اۋىل جۇرتشىلىعىنا دەگەن كومەگىمىزدى اياماي، قولداۋ تانىتۋ – ءبىزدىڭ باستى مىندەتىمىز. جىل سايىن وتەتىن مادەنيەت كۇندەرىن وتكىزۋ فورماتى بيىل وزگەرتىلىپ، اۋىلدىق مادەنيەت ۇيلەرى مەن كلۋبتارى قامتىلدى. بۇل بايقاۋعا 33 مادەنيەت نىسانى قاتىستى، ولاردىڭ بارلىعىنا دا سىيلىقتار بەرىلەدى. ءار اۋىلدا، ءاربىر ەلدى مەكەندە ۇلكەندەر ءۇشىن دە، جاستار ءۇشىن دە كلۋبتاردىڭ، مادەنيەت ۇيلەرىنىڭ بولعانى ماڭىزدى. سول ماقساتتا جۇمىس جۇرگىزىپ كەلەمىز. وبلىستاعى مادەنيەت نىساندارىنىڭ كۇردەلى جوندەۋ جۇمىستارى مەن جوبالىق-سمەتالىق قۇجاتتارىن ازىرلەۋدىڭ وزىنە عانا 1،1 ملرد. تەڭگە ءبولىندى. الداعى ۋاقىتتا دا بىرلەسىپ اتقارعان ىستەرىمىز جەمىستى بولسىن! مادەنيەتىمىزدى، باعا جەتپەس ونەرىمىزدى ناسيحاتتاۋ جولىنداعى ەڭبەگىمىز ەسەلەنە بەرسىن، – دەدى قۇتتىقتاۋ سوزىندە وبلىس اكىمى ا. باتالوۆ.
بايقاۋ قورىتىندىسى بويىنشا 8 اۋىلدىق مادەنيەت ءۇيى جەڭىمپاز دەپ تانىلىپ، ءارقايسىسىنا 300 مىڭ تەڭگەدەن اقشالاي سىيلىق سەرتيفيكاتى مەن كەشەندى دىبىس اپپاراتۋرالارى بەرىلدى.
سالتاناتتى ءراسىم بارىسىندا قاتىسۋشىلاردىڭ بارلىعى دا ماراپاتتالىپ، سىيلىقتارعا يە بولدى. ماسەلەن، 10 اۋىلدىق مادەنيەت ءۇيى مەن كلۋبتارعا دىبىس اپپاراتۋراسى سىيعا تارتىلسا، قالعان 15-ىنە كومپيۋتەرلەر تارتۋ ەتىلدى. ءسويتىپ، كونكۋرستىڭ بارلىق قاتىسۋشىلارىنا مادەنيەت نىساندارىنىڭ جۇمىسىن جاقسارتۋعا، ماتەريالدىق-تەحنيكالىق بازاسىن نىعايتۋعا باعىتتالعان سىيلىقتار بەرىلدى.
شارا بارىسىندا كونكۋرسقا قاتىسۋشىلاردىڭ ۇزدىك نومىرلەرىنەن دايىندالعان گالا-كونسەرت ۇسىنىلادى.
اتاپ وتسەك، الماتى وبلىسىندا 563 مادەنيەت نىسانى مەن ارحيۆ بار. بيىلعى جىلى مادەنيەت سالاسىنىڭ بيۋدجەتى 8،3 ملرد. تەڭگەنى قۇرادى. قازىرگى كەزدە سارقان اۋداندىق مادەنيەت ءۇيى، جامبىل اۋدانى مىڭبايەۆ اۋىلىنداعى، سارقان اۋدانى باقالى اۋىلىنداعى اۋىلدىق مادەنيەت ۇيلەرى، تالدىقورعان قالاسىنداعى مەملەكەتتىك ارحيۆ عيماراتىنا كۇردەلى جوندەۋ جۇرگىزىلىپ، سول سياقتى 5 مادەنيەت نىسانىنىڭ جوندەۋ جۇمىستارىنىڭ جوبالىق-سمەتالىق قۇجاتتارى دايىندالۋدا.
الماتى وبلىسى اكىمىنىڭ باسپا ءسوز قىزمەتى
