ynda ótken saltanatty sharada quttyqtaý sóz sóilegen oblys ákimi Amandyq Batalov:
– Mine, úshinshi jyl qatarynan biz osyndai kezdesý ótkizip, jýrnalister arasynda «Samǵaý» oblystyq baiqaýynyń júldegerlerin marapattap kelemiz. Bul baiqaý Elbasynyń «Rýhani jańǵyrý» baǵdarlamasy aiasynda ótkizilip otyr. Baǵdarlamany odan ári júzege asyrýǵa Memleket basshysy Qasym-Jomart Toqaev qoldaý kórsetýde.
Maǵan sizderdiń tek jaǵymdy jańalyqtaryńyz ǵana emes, syn materialdaryńyz da kómektesedi. Men kúndelikti jumysymdy aqparat quraldarynda Almaty oblysy týraly shyqqan materialdardy oqyp-tanysýdan bastaimyn.
Jaqsy jańalyq oqysam, qýanamyn, problemalar jaily bilgende, birden tapsyrma berip, máseleni baqylaýyma alamyn, qajet bolsa, sol jerge baryp kóremin. Sizderdiń maǵan kóp kómekterińiz tiedi. Sebebi barlyq jerge baryp, kórip, bilýge meniń múmkindigim bola bermeidi, kóp nárseni sizderdiń aqparattyńyz arqyly oqyp-bilip otyramyn.
Baiqaý 11 nominatsiia boiynsha ótip, jeńimpazdar marapattaldy. Solardyń qatarynda «Úzdik jýrnalist», «Úzdik operator», «Úzdik bloger», «Úzdik qalalyq, aýdandyq gazettiń tilshisi», «Úzdik montajer», «Úzdik fototilshi» t.b. bar. Jeńimpazdardyń árqaisysyna arnaiy statýetka, diplomdar men 200 myńnan 500 myń teńgege deiingi aqshalai syilyq berildi.
Úzdik jelilik basylym retinde oblystyq «Ogni Alataý» gazetiniń saity jeńimpaz dep tanylsa, ekinshi oryndy oblystyq «Jetisý» gazetiniń saity aldy. Úshinshi oryn «Zaman jarshysy» aýdandyq gazetiniń Karasayinfo.kz saityna berildi.
«Jetisý» telearnasynyń qyzmetkerleri de birqatar júldege ie boldy. Máselen, Madina Aitqaliqyzy – úzdik telejýrnalist, Shalqar Qusaiynov – úzdik montajer, Aidos Qaliev úzdik operator atandy. 2 jáne 3 oryndarǵa redaktor Nazgúl Aiazbaev, operatorlar Qairat Qazturǵanov, Mádi Baibosynov, beineinjener Aleksandr Belov, rejisser Daniiar Mustafaev laiyq dep tanyldy.
Oblys jýrnalistikasyna qosqan úlesi úshin «Habar» telearnasynyń menshikti tilshisi, ardager jýrnalist Tileýqabyl Myńjasar marapattalyp, oblys basshylyǵyna alǵysyn bildirdi.
– Almaty oblysynda 20 jyldan astam tilshi boldym. Árqashan oblysta atqarylyp jatqan isterden habar bolyp otyrdym. Qazir Almaty qalasynda turamyn. Biraq áli kúnge deiin Taldyqorǵandy, osy jerdiń halqyn saǵynamyn. Taldyqorǵanǵa jol túskende, rizashylyqpen kelemin, óńirdiń jaqsylyqtaryna sizdermen birge qýanyp júremin, – dedi T. Myńjasar.
Jýrnalister atynan Qarasai aýdandyq «Zaman jarshysy» gazetiniń bas redaktory Atlana Isaeva sóz aldy.
– Aýdandyq basylymdardaǵy áriptesterimniń atynan osyndai syilyq berip jatqandaryńyz úshin eń aldymen, Amandyq Ǵabbasuly, sizge zor alǵys aitamyn. «Samǵaý» syilyǵy – bul Almaty oblysyndaǵy aqparat quraldary qyzmetkerleriniń kásibi turǵyda odan ári izdenýi, ósýi úshin yntalandyratyn shara. Bul baiqaýǵa óńirlikten bastap ortalyq basylymdarǵa deiin, jelilik, elektrondyq aqparat quldarynyń da qatysýyna múmkindik jasalǵany qýantady. Bul árbir jýrnalist úshin óziniń kásibi mashyǵyn damytýǵa, talantyn ushtaýǵa berilgen qosymsha múmkindik, - dei kele A. Isaeva jeńimpaz áriptesterine quttyqtaý tilegin bildirdi.
Shara sońy merekelik kontsertpen túiindeldi.
Almaty oblysy ákiminiń baspasóz qyzmeti
