Baranov Mihail Vasilevich 1941 jyly Keńes armiiasynyń qataryna shaqyrylyp, 1947 jyly áskerden qaitty. Ardager I dárejeli "Uly Otan soǵysy" ordenimen, kóptegen áskeri jáne mereitoilyq medaldarmen marapattaldy.
– Mihail Vasilevich, Sizdi Uly Jeńis merekesimen shyn júrekten quttyqtaimyn. Siz qandai qurmetke de laiyqsyz. Siz siiaqty jaýyngerler Jeńisti jaqyndatyp, beibit ómirdi qamtamasyz etti. Sizdi aman-esen kórý – biz úshin qýanysh. 100 jasqa kelgen mereitoiyńyzdy qarsy alýyńyzǵa tilekshimin, – dedi Amandyq Batalov. «Qurmet kórsetkenderiń úshin úlken rahmet. Men óte qýanyshtymyn. Búgin bárimiz úshin aitýly mereke» dedi biyl 98 jasqa keletin ardager alǵysyn bildirip.
– 7 mamyrda 97 jasqa toldym. Soǵys jyldarynda aty ańyzǵa ainalǵan Baýyrjan Momyshulymen bir gvardiiada boldym. Ol kezde men Jeńistiń 76 jyldyǵyn kóremin dep oilaǵan da joq edim. Búginde balalarymdy ósirip-jetkizdim, qazir 25 nemerem men 45 shóberem bar. Jastar, Otandy qorǵaýǵa árdaiym daiyn bolyńdar, týǵan eldi súiińder, patrioty bolyńdar. Qazir biz jaqsy kezde ómir súrip jatyrmyz. Elbasyna, Prezidentimizge biz siiaqty ardagerlerge kórsetip otyrǵan qamqorlyqtary úshin shyn júrekten rizamyz. Eń bastysy bárińizge myqty densaýlyq tileimin. Mereke qutty bolsyn! – dedi ardager.
– Oblysta Siz siiaqty 41 ardager bar. Sizben bir dáýirde ómir súrgenimiz biz úshin maqtanysh. Eń bastysy, aýyrmańyz. Biz sizdiń 100 jasqa kelgen mereitoiyńyzdy toilaimyz áli. 9 Mamyr merekesimen taǵy bir márte quttyqtaimyn. Jeńisti ápergenderińiz úshin sizderge zor alǵys aitamyz, barsha ardagerlerdiń aldynda basymyzdy iemiz, – dedi Amandyq Batalov.
Eske salsaq, Qańtarbai Sársenbai maidanǵa 18 jasynda 1942 jyly ketti. Maidandaǵy erligi úshin I jáne II dárejeli «Uly Otan soǵysy» ordenderimen nagradtaldy.
Eske salsaq, Jeńistiń 76 jyldyǵyna orai Uly Otan soǵysyna qatysqan Almaty oblysyndaǵy 41 ardager men UOS múgedekterine bir million teńgeden bir rettik tólemaqy beriledi. Sonymen qatar tólemder Jeńiske úles qosqan 15 sanattaǵy azamattarǵa da túrli kólemde qarastyrylǵan. Osy sanattaǵylarǵa bir rettik materialdyq kómekke jalpy somasy 328,2 mln. teńgeden astam qarjy bólinip, 8718 adam qamtylmaq.
