Ázirshe Májilistiń jańa quramynyń qarqyny jaman emes. Osy baǵyttan ainymasa bolǵany.
Jalpy, úlken saiasi reformadan keiin jasaqtalǵan Májilistiń qazirgi quramyna qarap, qazaq tili saiasattyń tiline ainalǵanyn anyq baiqaýǵa bolady. Búginde ózekti, ótkir dúnielerdiń kópshiligi qazaq tilinde aitylyp, qazaq tilinde sóz bolyp jatyr.
Máselen, osyǵan deiin "Samuryq-Qazyna" ál-aýqat qoryn basqaryp, shalqyp-tasyp kún keshken sý jańa Energetika ministri Almasadam Sátqalievti depýtattar qazaq tilinde sóileýdi talap etkennen keiin ol kópshilik aldynda 6 aida qazaq tilin úirenip, depýtattar men jýrnalisterdiń saýaldaryna qazaq tilinde jaýap beretinin aityp, ant-sý ishti.
Endi 6 aidyń ótkenin kútemiz.
Sátqalievtiń halyq aldynda ýáde berýine birinshi kezekte depýtattar, odan keiin jýrnalistter qaýymy da yqpal etkeni sózsiz.
Osy rette Jańa Qazaqstannyń depýtattary qoǵamdyq ómirde qany tamyp turǵan qandaida bir máselelerdi jasqanbai aitatyn bolsa, ony jýrnalister ilip áketip, álgi másele oń baǵytta sheshilmeiinshe, qoǵamdyq pikirdi kúsheitetin kúshe ie ekenin osy joly taǵy da kózimiz jetti.
Mundai sátterde jýrnalister qaýymy da ózderiniń qoǵamdyq-saiasi ómirde tórtinshi biliktiń ókili ekenin sezineri anyq.
Osy turǵydan alǵanda depýtattardyń ózekti máselelerdi qaýzap, qoǵamdyq oidyń generatoryna ainalýy mańyzdy ekenin baiqaisyń.
Ras, Parlament qabyrǵasynda qoǵamdyq oidyń generatoryna ainalatyn depýtattar bar. Olar – Baqytjan Bazarbek, Ermurat Bapi, Qazybek Isa, Abzal Quspanov jáne Rinat Zaitov.
Osylardyń arasynda Baqytjan Bazarbektiń qarqyny kópshiliktiń qýantyp otyrǵany anyq.
Búginde ol ózi jyldar boiy kóterip júrgen jerdi zańsyz basyp alý máselesi joǵary deńgeide kóterip qazaq jerin baýyryna basyp alǵan latýfindistterdiń ishkenin iriń, jegenin jelim qylýǵa tas túiin bekingendei... Bákeńniń osy baǵytta jumys istegenin halyq ta qoldaidy.
Budan basqa Respublica partiiasynan depýtattyq mandatqa ie bolǵan qyz-jigitter de óz partiialarynyń qoǵamdyq-saiasi ómirde tanymaldyǵy artýy úshin ózekti máselelerdi kóterip saiasattyń kórkin qyzdyratynyna senimdimiz.
Sonymen qatar "Aq jol" partiiasy da saiasi básekeden qalmai batyl bastamalardy qolǵa alyp, sailaýshylardyń kóńilinen shyǵýǵa baryn salatyny anyq.
Parlamenttegi osydai áreketterdi kórgennen keiin boiyna artyq salmaq jinaǵan AMANAT partiiasy da salmaǵynan aiyrylyp, yldym-jyldym shuǵyl áreketke beiimdelýine týra keledi.
Osyǵan deiin qalǵyp-múlgip otyrǵan AMANAT-tyń eski quramy qatarlaryn jańadan qosylǵan Baqytjan Bazarbek syndy áriptesterimen sinhrondy túrde jumys isteýge májbúr.
Sondyqtan jańadan jasaqatalyp jumysyn bastaǵan Májilisten kúterimiz kóp.
Nurlan JUMAHAN
