Jańa Qazaqstan aldaǵy ýaqytta Altynbek Sársenbaev pen Zamanbek Nurqadilovtyń qazasyn qaita tergep, shyndyqty sý betine shyǵarýy múmkin. Sońǵy ýaqyttary 18 jyl boiy jabýly qazan kúiinde qalǵan istiń qaqpaǵy ashylýǵa shaq tur. Óitkeni Altynbek Sársenbaev pen onyń serikteriniń qazasy boiynsha aiyptalyp temir torǵa toǵytylǵan Rýstam Ibragimov «sóilei» bastady. Kúni keshe ǵana «Zlobnaia Tateshka» arnasynda Rýstam Ibragimovtyń suhbaty jariialandy, – dep jazady Dalanews.kz.
Rýstam Ibragimov 2007 jyly Altynbek Sársenbaev pen onyń úzegiles serikteriniń kózin joiýdy tapsyrys bergen Rahat Áliev pen Álnur Musaev ekenin sol kezdegi Ulttyq qaýipsizdik komitetiniń tóraǵasy Amangeldi Shabdarbaev aitqanyn bilemiz.
Ibragimov bul joly da «Altynbek Sársenbaevty óltirýge Álnur Musaevtyń ózi tapsyrma berdi, Áliev isti advokat Nurlan Óstemirov arqyly baqylady» dep otyr.
Ibragimov tanymal saiasatkerdiń kózin joiýǵa 2007 jyly UQK-nyń jedel ýákili Sergei Klimchýk tartylǵanyn (keiin ol QR UQK 5-shi departamentin basqardy, al 2020 jyldan bastap Qostanai oblystyq UQKD-ny basqarǵan) tilge tiek etti.
Sonymen qatar Ibragimov tergeý barysyn burmalaýǵa sol kezdegi Ishki ister ministri Baýyrjan Muhamedjanov pen eks-prokýror Rashid Túsipbekov jáne tergeý tobynyń jetekshilik jasaǵan Mashanlonyń tikelei qatysqanyn da ashyp aitty. Demek aldaǵy ýaqytta Baýyrjan Muhamedjanovtan jaýap alynyp jatsa, tańqalmaimyz.
– Altekeńdi óltirýdegi basty maqsat – elde turaqsyzdyq ornatý boldy. Al bul iske Senat apparatynyń basshysy Erjan Ótembaevty aralastyrýdaǵy maqsat – Nursultan Nazarbaev qaitys bolǵan jaǵdaida onyń mindetin atqaratyn Senat tóraǵasy Nurtai Ábiqaevty qyzmetinen ketirý kózdelgen edi. Áliev pen Musaev Nazarbaevtyń ornyna Dariǵa Nazarbaevany ákelmek boldy, – deidi Ibragimov.
Budan basqa Ibragimovke ózine sol kezdegi Ishki ister vitse-ministri Qalmuhambet Qasymov Altekeńdi óltirýge Ótembaev pen Ábiqaev tapsyrys berdi dep aitýdy talap etken. Mundaǵy maqsat Nazarbaev pen Ábiqaevtyń arasyn sýytý bolǵan dep joramaldaidy.
