Oblys ortalyǵy Túrkistan qalasynda ótken «Altyn kúz — 2018» aýylsharýashylyǵy qyzmetkerleriniń merekesi aiasynda Agroónerkásip kesheniniń damý baǵdarlamasy kórsetkishterin ozat oryndaǵany úshin Sairam aýdany III — shi oryndy iemdendi.
Atalǵan marapatty oblys ákimi Janseiit Túimebaevtyń ózi aýdan ákimi Baqtiiar Mamaevqa tabystap, aýdannyń aýylsharýashylyǵy salasynyń eńbekkerlerine mol tabys tiledi.
Sonymen qatar, atalǵan shara barysynda «Ozat kókónis óndirýshi» nominatsiiasymen «Mankent Agro» ÓK marapattaldy. Shara sońynda oblys basshysy aýdandar tarapynan uiymdastyrylǵan jármeńkeni aralap kórdi.
Dál osy kúni qala turǵyndary men qonaqtar qonaqjai sairamdyq diqandardyń aýylsharýashylyq jármeńkesinen ózderine qajetti ónimderdi qýana satyp aldy, jergilikti ónerpazdardyń kontserttik baǵdarlamasyn tamashalady.
Sairamdyqtar sondai-aq, elimizdiń azyq-túlik qoryn baiytýǵa da salmaqty úles qosyp keledi. Máselen, 2016-2017 jyldary aýdanda 16417 tonna et, 97284,8 tonna sút óndirilip, 13 million 128 myń dana jumyrtqa alyndy. Aýdan eńbekkerleri memlekettiń «Sybaǵa», «Qulan» jáne «Altyn asyq» baǵdarlamalary boiynsha da ózderine júktelgen tapsyrmalardy eselep oryndady. Sonyń aiǵaǵyndai, aýdandaǵy mal bordaqylaý alańdarynda bir mezette myńdaǵan iri qara semirtilip jatyr. Aýdan boiynsha 10-15 iri qarany bordaqylaý jáne januialyq sút aýlalaryn qurý tapsyrmalary da jemisti júzege asqanyn aita ketken oryndy.
Árine, adam aǵzasyna óte qajet dárýmen bolyp tabylatyn kókónis ósirý de aýdanda myqtap qolǵa alynǵan. Qazir sairamdyqtar 79 jylyjaida jyldyń tórt mezgilinde kókónis ósirip, dastarhan bailyǵyn molaitýǵa úles qosyp júr.
