«Nazarbaev Zıatkerlik mektepteri» derbes bilis berý uıymynyń basqarma tóraǵasy Kúlásh Shamshıdınova atap ótkendeı, balalardyń mahabbaty – muǵalim mamandyǵynyń eń basty artyqshylyǵy.
– 20-30 jyl buryn oqytqan shákirtiń seni kórgen kezde, «Siz kezinde meniń ustazym boldyńyz, sizge kóp rahmet» degen sóziniń ózi biz úshin úlken marapat. Qurmetti áriptester, qoǵam muǵalimderge úlken úmit artady. Muǵalimge qoıylatyn talaptar joǵary. Eger ár kún saıyn álemdi jaqsartatyn bir jan bolsa, bul-muǵalim! – dedi K. Shámshıdınova.
«Álem muǵalimi syılyǵyna úmitker Ashat Jumabekov muǵalim bolýdy bala kezinde-aq sheship qoıǵan. Onyń eń birinshi oqýshysy inisi bolǵan. Ashat inisine 6 jasynda úsh tańbaly sandardy kóbeıtýdi úıretken.
– Mahatma Gandı aıtqandaı, álemdi ózgertkiń kelse, óziń ózgerip, sol ózgeris bol. Muǵalim jańalyqtardan habardar bolyp, jańa ádistemeler men tehnologıalarmen jumys isteı bilýi qajet. Bizdiń jetistikterimiz-bizdiń oqýshylarymyzdyń jetistikteri. Osyndaı konferensıalar bizge tájirıbe almasýǵa jáne alǵan bilimimizdi tájirıbede qoldanýǵa múmkindik beredi, – dedi A. Jumabekov.
Qala ákimi Altaı Kólginov pedagog mamandyǵy – qazir álemdegi eń mańyzdy mamandyqtardyń biri ekenin atap ótti.
– Ustaz – qoǵamdaǵy basty tulǵa. Pedagog balalardy tárbıelep, bilim beredi. Balanyń tulǵa bolyp qalyptasýyna úlken septigin tıgizedi. Jahandyq álemniń eńbek naryǵynda bolyp jatqan transformasıalar árbir muǵalimdi «ómir boıy bilim berý» prınsıpin túsinýdi jáne qabyldaýdy talap etedi. Muǵalimderimiz árdaıym bir-eki qadam alda bolýy kerek, – dedi A. Kólginov.
