Reseide bir táýliktiń ishinde aiýlardyń adamdarǵa shabýyl jasaǵan úsh oqiǵasy tirkeldi. Eń qaiǵyly jaǵdai Altai Respýblikasynda bolyp, 29 jastaǵy týrist áiel jyrtqyshtyń shabýylynan qaza tapty, dep habarlaidy dalanews.kz.
Altai Respýblikasynyń Artybash aýylyndaǵy "Istok" demalys bazasynda aiý tún ishinde týrister ornalasqan shatyrǵa shabýyl jasaǵan.
Qaza tapqan áiel – Novosibirden kelgen 29 jastaǵy Snejana. Ol demalys ornyna súiiktisimen birge barǵan.
Tótenshe jaǵdailar qyzmetindegi derekkózdiń aitýynsha, aiý áieldi shatyrdan súirep shyǵaryp, ormanǵa alyp ketken. Jyrtqysh oǵan aýyr jaraqat salyp, denesin kómip tastaýǵa áreket jasaǵan. Jergilikti turǵyndar kómek kórsetýge tyrysqanymen, aiý olarǵa da tap bergen.
Kýágerlerdiń sózinshe, jyrtqysh tipti atylǵan oqtan da qoryqpaǵan. Oqiǵa ornyna kelgen politseiler aiýǵa emes, aýaǵa oq atqan.
Qaza tapqan Snejananyń Resei Tótenshe jaǵdailar ministrliginiń Novosibir oblysy boiynsha basqarmasynda qyzmet etkeni belgili boldy. Ol jýyrda qadaǵalaý qyzmetiniń inspektory laýazymyna taǵaiyndalǵan jáne qaiǵyly oqiǵa kezinde eńbek demalysynda júrgen.
BAQ málimetinshe, 29 jastaǵy áiel belsendi ómir saltyn ustanyp, sportpen ainalysqan jáne taýǵa jii shyqqan.
Oqiǵadan keiin óńir biligi aiýlardy atýǵa qosymsha ruqsat bergen. Artybash aýylynda saǵat 20:00-den 10:00-ge deiin komendanttyq saǵat engizilip, Teletsk kóli men Biia ózeniniń jaǵalaýynda shatyr tigýge tyiym salyndy.
Sondai-aq týrister jii baratyn Korbý sarqyramasyna aparatyn baǵyt ýaqytsha jabyldy.
