Almaz Sharman: «Aýrýlardyń aldyn alýǵa kóp investitsiia salsaq, adamdar soǵurlym az aýyrady»
Almaz Sharmannyń aitýynsha, qazirgi indet eldegi epidemiianyń álsiz tustaryn kórsetti. Immýnolog qazirgi kezde kadr tapshylyǵyna bailanysty epidemiologiialyq baqylaý máselelerin sheshý óte qiyn degen pikirde.
– Men 40 jyldyq tájiribesi bar immýnologpyn jáne óz kezeńinde jumys istegen epidemiolog pen virýsologtardyń qandai ekenin bilemin. Ókinishtisi sol, qazir kóbisi qyzmette emes. Qyzmettiń bul salasy óte mańyzdy. Sondyqtan biz jarty jyl buryn dárigerler tobymen densaýlyq saqtaý júiesin jańǵyrtý, buryn bolǵan gigiena jáne epidemiologiia mektebin qaita qurý týraly úndeý tastadyq. Bul bolashaqta epidemiia jaǵdaiynda epidemiolog pen virýsologtardyń myqty kadrlyq áleýetin qalyptastyrý úshin qajet. Alaida biz úshin bul sala búgin qajet. Sondyqtan qazirgi ýaqytta epidemiianyń taralýyn jaqsy qadaǵalap, kásibi mamandarmen virýsty jeńe alatyn epidemiologtar daiarlanýda, – dedi A. Sharman.
Ǵalym el aýmaǵynda buryn bolǵan áleýettiń joǵalǵanyn ókinishpen eske aldy. Biraq qazir ony qalpyna keltirýdiń erekshe múmkindigi bar. Bul úshin adam resýrstaryna qomaqty investitsiialar qajet.
– Meditsinalyq ýniversitetterde epidemiologiia jáne profilaktikalyq meditsina máselelerimen tikelei ainalysatyn qoǵamdyq densaýlyq saqtaý mektepterin qaita qurý qajet. Bul óte mańyzdy – biz aýrýlardyń aldyn alýǵa neǵurlym kóp investitsiia salsaq, adamdar soǵurlym az aýyrady jáne emdeýge az qarjy jumsalady, – dedi A. Sharman.
