Almatyda avtoturaq keńistigin uiymdastyrý qaǵidalaryn jańartý kózdelip otyr. Tiisti jobany máslihat otyrysynda Jol qozǵalysy jáne jolaýshylar kóligin uiymdastyrý basqarmasynyń basshysy Erjan Dihanbaev tanystyrdy, dep habarlaidy dalanews.kz.
Qujatqa sáikes, kóppáterli turǵyn úilerdiń turǵyndary turǵylyqty jerinen 500 metr radiýsta ornalasqan bir kommýnaldyq avtoturaqta bir kólikti tegin qoiý alady. Bul rette naqty avtoturaq orny bekitilmeidi. Mundai tásil avtoturaqty barlyq paidalanýshy úshin tiimdi paidalanýǵa múmkindik beredi.
Sonymen qatar, qujatta avtoturaqtardy jabdyqtaý, olardyń jumys tártibi men tólem jasaý tásilderine qoiylatyn biryńǵai talaptar belgilengen. Qaǵidalar saqtalýy mobildi jáne statsionarlyq foto jáne beinetirkeý keshenderi arqyly baqylanady.
Júrgizýshilerge qolaily jaǵdai jasaý maqsatynda qoldanystaǵy jeńildik merzimderi de saqtalady. Jolaýshylardy otyrǵyzý nemese túsirý úshin trotýar boiyndaǵy avtoturaqtarda alǵashqy 5 minýt, al alańdaǵy avtoturaqtardan shyǵýǵa 10 minýt tegin ýaqyt beriledi.
Buǵan qosa, soǵys ardagerleri, múgedektigi bar adamdar, kópbalaly analar, elektr kólikteriniń ieleri jáne jedel qyzmetterdiń kólik quraldary avtoturaq aqysyn tóleýden tolyq bosatylady.
