Almatyda qalalyq Ardagerler keńesi Prezidiýmynyń keńeitilgen otyrysy ótti. Jiynǵa Prezidiým músheleri, aýdandyq Ardagerler keńesteriniń tóraǵalary jáne qalalyq ardagerler uiymdarynyń belsendi ókilderi qatysyp, aldaǵy Quryltai sailaýyna ardagerlerdiń qatysýyn uiymdastyrý máselesin talqylady, dep habarlaidy dalanews.kz.
Almaty qalalyq Ardagerler keńesiniń tóraǵasy Aqan Bijanov baiandama jasap, kún tártibindegi máselelerge toqtaldy. Ol qalalyq jáne aýdandyq Ardagerler keńesteriniń aldaǵy kezeńdegi negizgi mindetteri men jumys baǵyttaryn aiqyndady.
«Ardagerler - qoǵamdaǵy birlik pen sabaqtastyqtyń, eldik qundylyqtar men ómirlik tájiribeniń altyn kópiri. Olar jas urpaqqa baǵyt-baǵdar berip, qoǵamdyq kelisim men turaqtylyqty nyǵaitýǵa úles qosyp keledi. Sondyqtan aldaǵy Quryltai sailaýynda ardagerlerdiń azamattyq belsendiligi erekshe mańyzǵa ie. Biz árbir ardagerdi jáne qala turǵyndaryn sailaýǵa belsendi qatysyp, óz tańdaýyn jasaýǵa shaqyramyz. Bul - elimizdiń bolashaǵyna degen jaýapkershiligimizdi kórsetetin mańyzdy qadam», - dedi Bijanov.
Jaryssóz barysynda aýdandyq Ardagerler keńesteriniń tóraǵalary men ózge de qatysýshylar pikirlerin bildirdi.
Kún tártibindegi birinshi másele boiynsha ardagerler men turǵyndardyń aldaǵy sailaýǵa belsendi qatysýyn qamtamasyz etý, sondai-aq túsindirý jumystaryn júrgizý maqsatynda Almaty qalalyq Ardagerler keńesiniń shtaby quryldy.
Otyrys qorytyndysynda Almaty qalalyq jáne aýdandyq Ardagerler keńesteriniń aldaǵy mindetteri men jumys baǵyttaryn aiqyndaityn tiisti sheshimder qabyldandy.
