Almaty qalasynyń turǵyny kóziniń túsin ózgertý úshin shetelge baryp, jasatqan operatsiiadan keiin aýyr asqynýlarǵa tap boldy. Sonyń saldarynan áieldiń kórý qabileti kúrt nasharlap, I toptaǵy múgedektikke shyǵýyna týra kelgen, dep habarlaidy dalanews.kz
Dárigerlerdiń málimetinshe, operatsiiadan keiin naýqasta glaýkoma men kózdiń móldir qabyǵynyń buldyrlanýy damyǵan. Nátijesinde bir kózi múldem kórmei qalsa, ekinshi kózimen tek jaryqty ǵana ajyrata alǵan.
Kómek izdegen áiel Qazaqstandaǵy jáne sheteldegi birneshe meditsinalyq mekemege júgingenimen, eshbir maman onyń kórý qabiletin qalpyna keltirýge táýekel etpegen. Jalǵyz úmit retinde jaryqty sezý qabileti saqtalǵan kózi qalǵan.
Kúrdeli jaǵdaidy Almaty qalalyq ortalyq klinikalyq aýrýhanasynyń oftalmolog dárigeri Gúlzat Ábdiraiymova óz baqylaýyna alǵan.
«Gúlzat Ábdiraiymovanyń kúrdeli operatsiialardy sátti jasaitynyn estigen soń, dál osy dárigerge júginýdi jón kórdim. Maǵan qaitadan jaryq dúnieni kórýge múmkindik bergen kásibi biliktiligi úshin dárigerlerge zor alǵysymdy bildiremin», – deidi patsient.
Mamandardyń aitýynsha, naýqastyń jaǵdaiyn kózishilik qysymnyń óte joǵary bolýy odan ári qiyndatqan. Operatsiia barysynda ekspýlsivti qan ketý qaýpi joǵary bolǵan. Mundai asqyný kórý qabiletiniń tolyqtai joǵalýyna ákelýi múmkin edi.
Soǵan qaramastan dárigerler jaryqty sezý qabileti saqtalǵan kózdi aman alyp qalýǵa sheshim qabyldaǵan. Eki saǵatqa jýyq ýaqytqa sozylǵan kúrdeli operatsiia barysynda antiglaýkomalyq hirýrgiialyq aralasý jasalyp, móldir qabyqqa transplantatsiia júrgizilgen.
Nátijesinde kózishilik qysym tómendetilip, operatsiiaǵa deiin tek jaryqty ǵana ajyratqan kózdiń kórý qyzmeti qalpyna keltirilgen. Hirýrgiialyq emnen keiin patsient qaitadan kóre bastaǵan.
Qazirgi ýaqytta áiel dárigerlerdiń turaqty baqylaýynda bolyp, ońaltý kýrsynan ótýde.
