Áleýmettik jelilerde D. Qonaev atyndaǵy ýniversitet jataqhanasynda qyzdyń soqqyǵa jyǵylǵany túsirilgen video tarady. Jariialanymdarda janjalǵa qatysýshylardyń biri prokýratýra qyzmetkeriniń qyzy ekeni aitylǵan, dep habarlaidy dalanews.kz.
Málimetterge sáikes, tóbeleske Abai oblysyndaǵy prokýrordyń qyzy men Atyraý oblysyndaǵy politsiia qyzmetkeriniń qyzy qatysqan. Redaktsiia saýalyna jaýap bergen Atyraý oblystyq politsiia departamenti istiń Almatyda qaralyp jatqanyn habarlaǵan.
Almaty prokýratýrasynyń málimetinshe, eki qyzdyń arasynda jeke bas arazdyǵynan janjal týyndaǵan. Keiin ol tóbeleske ulasqan. Oqiǵa bolǵan kezde qatysýshylardyń biri kámeletke tolmaǵan bolǵan.
Politsiia eki taraptyń da dene jaraqatyn alǵanyn málimdedi. Jeńil dárejedegi densaýlyqqa ziian keltirý faktileri boiynsha Qylmystyq kodekstiń 108-1-baby aiasynda sotqa deiingi tergeý bastalǵan.
Vedomstvo ókilderi janjalǵa qatysqan eki taraptyń áreketine de quqyqtyq baǵa berilip jatqanyn aitty. Isterdiń biri boiynsha sot sheshimi shyǵyp, Abai oblysynyń týmasy kináli dep tanylyp, oǵan qoǵamdyq jumystar jazasy taǵaiyndalǵan. Al Atyraý oblysynyń turǵynyna qatysty is boiynsha tergeý áli jalǵasyp jatyr.
Qadaǵalaý organynyń málimdeýinshe, áleýmettik jelilerde taraptardyń birine qoldaý kórsetilip jatyr degen mazmundaǵy jalǵan aqparattar tarap ketken.
«Áleýmettik jelilerde istiń qaralý barysy týraly burmalanǵan túsinik qalyptastyratyn jáne taraptardyń birine qamqorlyq jasalyp jatyr degen aqparattar taralýda. Bul málimdemeler shyndyqqa sáikes kelmeidi.
Qaqtyǵysqa qatysýshylardyń týystyq, qyzmettik nemese ózge de bailanystary protsessýaldyq sheshim qabyldaýǵa áser etpeidi jáne áser ete almaidy. Zań aldynda bári teń», – dep málimdedi prokýratýra.
Qazir tergeý barysy Almaty qalasy prokýratýrasynyń baqylaýynda.
