Almatydaǵy Esentai ózeninen munai ónimderiniń shekti ruqsat etilgen mólsherden joǵary ekeni anyqtaldy. Alaida lastaný kózi ázirge belgisiz, dep habarlaidy dalanews.kz.
Almaty qalalyq Ekologiia departamentiniń basshysy Dinmuhamed Lesbekovtiń óńirlik kommýnikatsiialar qyzmetinde ótken brifingte aitýynsha, mamandar Esentai, Úlken jáne Kishi Almaty, Aqsai, Basqarasý ózenderi men Sairan kóliniń jaǵdaiyn teksergen.
Zertteý nátijesinde munai ónimderiniń shekti ruqsat etilgen kontsentratsiiasynan asý tek Esentai ózeninde tirkelgen. Sonymen qatar topyraqtan alynǵan synamalarda ziiandy zattardyń shekti mólsherden asqany anyqtalmaǵan.
Ekologiia departamentiniń málimetinshe, biylǵy alǵashqy jartyjyldyqta Almatyda 125 ekologiialyq tekserý júrgizilip, 58 zańbuzýshylyq anyqtalǵan. Nátijesinde 28 uiǵarym shyǵarylyp, 165 ákimshilik hattama toltyrylǵan.
Isterdi qaraý qorytyndysy boiynsha jalpy somasy shamamen 34 mln teńgege 162 ákimshilik aiyppul salynǵan. Onyń 19,5 mln teńgeden astamy óndirilgen.
Sonymen qatar mamandar Almatydaǵy ekologiialyq ahýaldyń kúrdeliligine nazar aýdardy. Buǵan deiin Naýryzbai aýdanyndaǵy turǵyndardyń shaǵymdarynan keiin júrgizilgen tekserýler barysynda densaýlyqqa qaýipti birqatar zattardyń mólsheri shekti ruqsat etilgen deńgeiden birneshe ese joǵary ekeni anyqtalǵan.
