Almatyda bes jańa mektep, úsh balabaqsha jáne birqatar bilim berý nysanynyń qurylysy júrip jatyr, dep habarlaidy dalanews.kz.
Almaty óńirlik kommýnikatsiialar qyzmetinde ótken brifingte qalalyq qurylys basqarmasynyń basshysy Nurbol Nursaǵatovtyń aitýynsha, qazirgi ýaqytta jalpy 1930 oqýshyǵa arnalǵan bes mektep pen 800 oryndyq úsh balabaqsha salynyp jatyr. Sonymen qatar Alǵabas shaǵynaýdanynda kolledj, eki shyǵarmashylyqty damytý ortalyǵy boi kóterýde. Qaladaǵy qoldanystaǵy mektepter men balabaqshalardy qaita jańǵyrtý jáne seismikalyq kúsheitý jumystary da jalǵasyp jatyr.
Onyń málimetinshe, №16, №112 jáne №170 mektepterine qosymsha ǵimarattar salynyp jatyr. Bul nysandar paidalanýǵa berilgennen keiin taǵy 900 oqýshy orny ashylady. Sonymen qatar 10 mektep pen eki balabaqshada qaita jańǵyrtý jáne seismikalyq kúsheitý jumystary júrgizilýde.
Jyl basynan beri Almatyda jeti bilim berý nysany paidalanýǵa berilgen. Olardyń qatarynda Zerdeli shaǵynaýdanyndaǵy 550 oryndyq mektep, Shuǵyladaǵy 340 oryndyq mektep-internat, Quramys, Jas Qanat jáne Qalqaman shaǵynaýdandaryndaǵy jalpy 820 oryndyq úsh balabaqsha, seismikalyq kúsheitilgen №10 balabaqsha jáne Saialy shaǵynaýdanyndaǵy shyǵarmashylyqty damytý ortalyǵy bar.
Qala ákimdiginiń josparyna sáikes, jyl sońyna deiin taǵy 15 bilim berý nysanyn aiaqtaý kózdelgen. Atap aitqanda, Zerdeli shaǵynaýdany men Eńbek kóshesinde jalpy 890 oryndyq eki mektep, úsh mektepke qosymsha ǵimarat, toǵyz mektepti qaita jańǵyrtý jáne Tilendiev kóshesinde jańa balabaqsha salý josparlanǵan.
Budan bólek, 14 nysan boiynsha jobalyq-smetalyq qujattama ázirlenip jatyr. Al №87 mektepke 300 oryndyq qosymsha ǵimarat salý jáne №112 mektepti qaita jańǵyrtý jobalary memlekettik saraptamadan ótken. Bul nysandardaǵy qurylys-montaj jumystary qazan aiynda bastalady.
Sondai-aq qalada bilim berý salasyndaǵy taǵy 16 joba júzege asyrylýda. Onyń ishinde eki shyǵarmashylyqty damytý ortalyǵy, birneshe balabaqsha jáne fizika-matematika mektebin qaita jańǵyrtý jobalary bar. Taǵy 20 nysan boiynsha jobalyq qujattama daiyndalyp jatyr. Olardyń qurylysy memlekettik saraptamadan ótkennen keiin 2027 jyly bastalady.
Nurbol Nursaǵatov mektepterdi jańǵyrtý baǵdarlamasyna da toqtaldy. Onyń aitýynsha, 2027 jyldyń sońyna deiin Almatyda 31 mektepti jańǵyrtý josparlanǵan. Qazir alty nysanda qurylys jumystary júrgizilip jatyr, eki nysan boiynsha konkýrs rásimderi ótip jatyr, al taǵy 14 mektepke jobalyq-smetalyq qujattama ázirlenýde.
