Qarjylyq monitoring agenttiginiń Almaty qalasy boiynsha departamenti prokýratýranyń úilestirýimen Alemcredit.com internet-resýrsy arqyly azamattarǵa kriptovaliýta túrinde mikrokredit beremiz degen jeleýmen jasalǵan alaiaqtyq deregi boiynsha tergeý júrgizip jatyr, dep habarlaidy dalanews.kz.
Tergeý derekterine sáikes, yqtimal qaryz alýshylar áleýmettik jeliler arqyly belsendi tartylǵan. Onda tiimdi sharttarmen qaryz beriletini týraly jarnama keńinen taratylǵan. Qaryz rásimdeý úshin azamattardan jeke basyn sáikestendirý rásiminen ótý, derbes derekterin usyný jáne elektrondyq qujattarǵa qol qoiý talap etilgen.
Alaida atalǵan rásimder aiaqtalǵannan keiin mámileniń naqty sharttary bastapqyda kórsetilgen talaptardan edáýir ózgeshe bolǵan. Qaryz alýshylarǵa ýáde etilgen somadan áldeqaida az qarajat aýdarylyp, onyń bir bóligi aldyn ala eskertilmegen komissiialar men ózge de tólemder retinde ustalǵan.
Sondai-aq mámile jasalǵanǵa deiin qaryzdyń tolyq quny, artyq tólem mólsheri, syiaqy men aiyppuldar týraly aqparat tolyq kólemde berilmegen. Qarajat úshinshi tulǵalardyń, iaǵni dropperlerdiń bank kartalary arqyly qaitarylǵan.
Internet-resýrstyń jumysyn qamtamasyz etý jáne qaryz alýshylarmen bailanys ornatý úshin zańdy tulǵalardy, telekommýnikatsiialyq resýrstar men tehnikalyq quraldardy qamtityn tarmaqtalǵan infraqurylym paidalanylǵan. Tintý barysynda jappai SMS-habarlama taratýǵa qoldanylǵan SIM-bokstar men kóp mólsherde SIM-karta tárkilendi.
Tergeý jalǵasyp jatyr. QR Qylmystyq-protsestik kodeksiniń 201-babyna sáikes ózge aqparat jariia etilmeidi.
