Almatyda bir táýlikte ailyq jaýyn-shashyn mólsheriniń jartysynan astamy jaýdy, dep habarlaidy dalanews.kz.
Qalada 10 mamyr saǵat 11:00-den bastap 11 mamyr saǵat 20:00-ge deiin 50,4 mm jaýyn-shashyn jaýǵan. Bul mamyrda belgilengen normanyń 51 paiyzyna teń.
Nóserge bailanysty kommýnaldyq qyzmetter kúsheitilgen rejimge kóship, sý basýdyń aldyn alý jáne saldaryn joiý jumystaryn júrgizip jatyr. Bul týraly qalalyq Kommýnaldyq infraqurylymdy damytý jáne turǵyn úi inspektsiiasy basqarmasy habarlady.
Qazir Almatynyń Qutqarý qyzmeti de táýlik boiy kezekshilik atqaryp jatyr. Olardyń qaramaǵynda assenizatorlyq kólikter, 15 motopompa bar. Al Tótenshe jaǵdailar departamenti 53 arnaiy tehnika men 240 qyzmetker jumyldyrǵan.
Jalpy qala boiynsha bir táýlikte jol salasynyń 3 myńnan asa jumysshysy, 1225 arnaiy tehnikasy jumysqa tartylǵan.
Sinoptikterdiń boljamynsha, 12 mamyrda Almatynyń kei jerlerinde jańbyr jaýyp, naizaǵai oinaidy. Al 13 mamyrdan bastap jaýyn-shashyn toqtap, kún ala bultty bolady.
