Almatyda qoǵamdyq kólikterdiń gaz quiý beketterindegi uzyn-sonar kezegin azaitý úshin taǵy tórt mamandandyrylǵan gaz toltyrý kompressorlyq stantsiiasy salynady. Bul týraly qalalyq máslihat sessiiasynda Jol qozǵalysyn uiymdastyrý jáne jolaýshylar tasymaly basqarmasynyń basshysy Erjan Dihanbaev málimdedi, dep habarlaidy dalanews.kz.
Tengrinews.kz málimetinshe, basqarma basshysy búginde Almatyda kún saiyn 3 200-ge jýyq avtobýs baǵytqa shyǵatynyn jetkizgen. Onyń eki myńǵa jýyǵy syǵylǵan tabiǵi gazben júredi. Al olardy táýligine qajetti kólemdegi gazben qamtýǵa qoldanystaǵy infraqurylymnyń qýaty jetkiliksiz.
"Qazir úsh stantsiia jóndeý jumystaryna bailanysty jabyq. Qoldanystaǵy segiz stantsiia táýligine nebári 250 myń tekshe metr gaz bere alady. Al qajettilik – 600 myń tekshe metr. Sondyqtan kún saiyn shamamen 350 myń tekshe metr tapshylyq týyndaidy", - dedi Erjan Dihanbaev.
Onyń sózinshe, máseleni sheshý úshin salynyp jatqan tórt jańa stantsiianyń ekeýi synaq rejiminde jumys istep tur, qalǵan ekeýi jazdyń sońyna deiin paidalanýǵa beriledi.
"Barlyq nysan iske qosylǵannan keiin Almaty táýligine qajetti 600 myń tekshe metr gazben tolyq qamtamasyz etiledi. Osylaisha qaladaǵy mamandandyrylǵan gaz toltyrý kompressorlyq stantsiialarynyń sany 12-ge jetedi", - dedi basqarma basshysy.
Eske salaiyq, buǵan deiin Dalanews.kz Almatynyń batys bóliginde kezekte turǵan birneshe avtobýsqa nazar aýdaryp, Almaty ákimdigine resmi saýal joldaǵan edi. Ákimdik redaktsiiaǵa joldaǵan jaýabynda kezektiń paida bolýyna úsh gaz toltyrý kompressorlyq stantsiiasynyń jóndeýge jabylýy sebep bolǵanyn málimdegen. Endi qala biligi bul máseleni sheshý úshin taǵy tórt jańa mamandandyrylǵan stantsiia salýdy josparlap otyr.
