Almatyda Aqordany basyp alýǵa áreket jasady dep aiyptalǵan bes belsendige sot úkimi shyqty, dep habarlaidy dalanews.kz.
Almaly aýdandyq qylmystyq ister jónindegi soty Qaisar Ózbek pen Talǵat Áshirovke jiyntyq qylmystyq quqyq buzýshylyqtar boiynsha 5 jyl 6 aidan bas bostandyǵynan aiyrý jazasyn taǵaiyndady. Al Asqar Nurmaǵan, Taǵai Ábdýáli jáne Dúisenbek Jaqashevtyń árqaisysy 5 jylǵa sottaldy. Bul týraly quqyq qorǵaýshy Baqytjan Tóreǵojina habarlady.
Sot protsesi jabyq rejimde ótti. Is boiynsha sot otyrystaryn jabyq ótkizý týraly ótinishti prokýror bergen. Buǵan kýágerlerdiń biriniń qaýipsizdigine alańdaýy sebep retinde kórsetilgen.
Aiyptaý aktisine sáikes, sottalýshylar aldaǵy áreketterin josparlap, daiyndyq jumystaryn júrgizý úshin jasyryn kezdesýler ótkizgen. Sonymen qatar olar WhatsApp messendjerinde «Qairat Komanda» atty ortaq chat qurǵan.
Tergeý nusqasy boiynsha, kezdesýler men bailanystar barysynda top músheleri Astana aýmaǵynda jappai tártipsizdik uiymdastyryp, bilikti basyp alýǵa, sondai-aq Qazaqstan Prezidentiniń rezidentsiiasy – Aqordany basyp alýǵa jáne halyqty stihiialyq túrde kóterýge daiyndalǵan. Bul áreketter 2025 jyldyń qańtar-maýsym ailary aralyǵynda jasaldy dep kórsetilgen.
Asqar Nurmaǵan, Ábdýáli Taǵai jáne Dúisenbek Jaqashevqa adamdar tobynyń bilikti kúshpen basyp alýyn nemese ustap turýyn nasihattaý, sondai-aq zorlyq-zombylyqpen, qiratýmen jáne bilik ókilderine qarsylyq kórsetýmen qatar júretin jappai tártipsizdikterdi daiyndaý jáne uiymdastyrý boiynsha aiyp taǵylǵan.
Al Qaisar Ózbek pen Talǵat Áshirovke atalǵan aiyptardan bólek, adamdar tobynyń quramynda jarylǵysh zattardy zańsyz satyp alý, saqtaý jáne tasymaldaý boiynsha da aiyp taǵylǵan.
Buǵan deiin, 4 qyrkúiekte, memlekettik aiyptaýshy bes sottalýshynyń árqaisysyna 8 jyldan bas bostandyǵynan aiyrýdy suraǵan edi.
Sottalýshylar taǵylǵan aiyptardy moiyndamaǵany týraly buǵan deiin habarlanǵan. Qorǵaý tarapy olardyń jappai tártipsizdik uiymdastyrýǵa qajetti qarjysy men qurylymy bolmaǵanyn aitqan.
Sottyń búgingi úkimimen prokýror suraǵan jaza merzimi tolyq kólemde taǵaiyndalǵan joq.
