Almatyda Almaty Superski taý kýrorty jobasyna arnalǵan qoǵamdyq tyńdaý ótti. Jiynda joba avtorlary bolashaq keshenniń negizgi baǵyttaryn tanystyryp, onyń týrizm, sport, ekologiia jáne qala ekonomikasyna yqpaly týraly aitty, dep habarlaidy dalanews.kz.
Jobany tanystyrǵan «Kazakh Tourism Development LTD» kompaniiasynyń bas direktory Erjan Erkinbaev bul bastama tek týristik nysan salý emes, Almaty taýlaryn qaýipsiz ári qoljetimdi etýge baǵyttalǵanyn jetkizdi. Onyń aitýynsha, joba ázirleý barysynda turǵyndardyń pikirleri, ekologtar men sala mamandarynyń usynystary zerttelgen.
Spikerdiń sózinshe, keiingi jyldary Shymbulaq kýrortyna kelýshiler sany aitarlyqtai artqan. Qazirgi infraqurylym demalys kúnderi júktemeni tolyq kótere almai otyr. Osyǵan bailanysty Almatynyń taý týrizmin damytý qajettiligi týyndaǵan.
Tyńdaýda Kókjailaý aýmaǵy kezdeisoq tańdalmaǵany aityldy. Mamandar birneshe aýmaqty zerttep, tabiǵi, klimattyq jáne infraqurylymdyq erekshelikterdi saralaǵan. Nátijesinde Kókjailaý men Kúmbel aýmaǵy eń qolaily nusqa retinde belgilengen.
Joba aiasynda 17 aspaly jol men 60 shaqyrymnan astam shańǵy trassasyn salý josparlanyp otyr. Kýrorttyń jalpy aýmaǵy –1022 gektar. Joba avtorlary qurylys ulttyq park aýmaǵynyń óte az bóligin ǵana qamtitynyn atap ótti.
Sondai-aq jańa kýrorttyń basty ereksheligi – onyń qoljetimdiliginde. Infraqurylym balalarǵa, qarttarǵa jáne múmkindigi shekteýli jandarǵa beiimdelmek. Arnaiy jaiaý baǵyttar, demalys oryndary, vizit-ortalyqtar men baqylaý alańdary qarastyrylǵan.
Qoǵamdyq tyńdaýda taý qaýipsizdigi máselesi de kóterildi. Joba aiasynda tsifrlyq navigatsiia, arnaiy belgilengen soqpaqtar, qutqarý júieleri men bailanys jelilerin damytý josparlanýda. Uiymdastyrýshylardyń aitýynsha, bul taýdaǵy tótenshe jaǵdailardyń aldyn alýǵa kómektesedi.
Ekologiia máselesine qatysty joba jetekshileri halyqaralyq tájiribe zerttelgenin aitty. Kýrortty jobalaýǵa Eýropanyń taý infraqurylymy boiynsha tájiribesi bar mamandar tartylǵan. Sonymen qatar qazaqstandyq ekologtar, gidrologtar men arheologtar ǵylymi zertteýler júrgizip jatyr.
Joba iske asqan jaǵdaida keminde 5 myń jańa jumys orny ashylady dep kútilýde. Mamandardyń pikirinshe, bul qala ekonomikasyna serpin berip, Almatynyń halyqaralyq týristik tartymdylyǵyn arttyrýy múmkin.
Qoǵamdyq tyńdaý sońynda joba avtorlary turǵyndarmen ashyq dialog jalǵasatynyn aityp, barlyq usynys pen eskertýler nazarǵa alynatynyn jetkizdi.
