Premer-ministr Oljas Bektenov Prezident Qasym-Jomart Toqaevtyń tapsyrmalaryn júzege asyrý máseleleri boiynsha keńes ótkizdi, dep habarlaidy dalanews.kz.
“Memleket basshysy Almaty qalasy men oǵan irgeles eldi mekender turǵyndary tarapynan “Almaty – Qaskeleń” jolyndaǵy kólik qozǵalysynyń joǵary júktemesine qatysty aitylyp júrgen shaǵymdarǵa nazar aýdardy.
Prezident joldy keńeitý jobasyn dereý bastaý týraly tapsyrma berdi.
Merdiger osy aptanyń sońyna deiin qajetti tehnika men jumys kúshin jumyldyrýy qajet. Qurylys jumystaryn dúisenbi, 20 shilde kúni bastaý kerek. Memleket basshysynyń tapsyrmasy sapaly ári barynsha qysqa merzimde oryndalýy tiis", — dep tapsyrdy Oljas Bektenov.
Premer-ministr joba qunynyń bekitilgenin jáne onyń ósýine jol berilmeitinin atap ótti.
"Jobany júzege asyrý maqsatynda satyp alynatyn jer ýchaskelerine qatysty alypsatarlyqqa jol berilmeýi úshin olardyń qunyn keshegi, 14 shildedegi jaǵdai boiynsha belgileý qajet", — dep atap ótti Oljas Bektenov.
Kólik ministri Nurlan Saýranbaev Almatydan Qaskeleń qalasyna deiingi avtojol ýchaskesiniń 8 shaqyrymdyq bóligin 8 jolaqqa deiin keńeitý jobasyn usyndy. Jobany qarjylandyrý Qazaqstannyń Damý banki arqyly júzege asyrylady. Eki jolairyq pen 9 jerústi jaiaý júrginshiler ótkelin salý josparlanyp otyr. Nátijesinde atalǵan ýchaskeniń ótkizý qabileti 2 ese artady. Qurylys jumystaryn aiaqtaý jáne paidalanýǵa berý 2027 jylǵy jeltoqsan aiyna josparlanǵan.
Almaty qalasynyń ákimi Darhan Satybaldynyń málimetinshe, megapoliske kún saiyn 300 myń avtokólik kiredi. Qala ishindegi avtokólikterdi qosa eseptegende, jol qozǵalysynyń jalpy kólemi 1 millionnan astam kólik quralyn quraidy. Almaty – Qaskeleń avtomobil joly Almaty aglomeratsiiasyndaǵy eń qarqyndy qozǵalys júretin jol ýchaskeleriniń biri. Bul joldaǵy qozǵalys qarqyndylyǵy táýligine shamamen 60 myń avtokólikke jetedi. Sondai-aq Abai dańǵylyn Úlken Almaty ainalma avtomobil jolyna deiin uzartý jobasy týraly baiandaldy.
Almaty oblysynyń ákimi Marat Sultanǵaziev Uzynaǵash aýylynan uzyndyǵy 32 shaqyrym bolatyn balama jol salý jumystarynyń bastalǵany týraly baiandady. Bul joba Almaty – Qaskeleń tas jolyna júktemeni azaitýǵa múmkindik beredi.
Atalǵan jobalar boiynsha Almaty qalasy men Almaty oblysynda jer máselelerin sheshý jumystary sońǵy satyda tur.
Sonymen qatar Almaty aglomeratsiiasyn damytý jónindegi sharalar talqylandy. Almaty – Esik jáne Almaty – Talǵar baǵyttaryndaǵy avtojol jobalary qaraldy. Sondai-aq relsti kólikti jáne Almaty metropolitenin damytý baǵytyndaǵy jumystar júrgizilýde.
Oljas Bektenov Almaty aglomeratsiiasynyń kólik bailanysy máselelerin keshendi sheshý boiynsha birqatar tapsyrma berdi.
