Almaty oblysyndaǵy Talǵar shatqalynda taýǵa shyqqan týristiń ústine tas qulap, ol aýyr jaraqat aldy, dep habarlaidy dalanews.kz.
Oqiǵa teńiz deńgeiinen 2 970 metr biikte bolǵan. Bul týraly habar túskennen keiin qutqarýshylar dereý jolǵa shyǵyp, zardap shekken adamǵa jetken. Olar týristke alǵashqy meditsinalyq kómek kórsetip, onyń jaǵdaiynyń aýyr ekenin anyqtaǵan.
Osydan keiin qutqarýshylar týristi kúrdeli taýly aimaq arqyly Kishi Talǵar asýyna deiin alyp shyqqan. Evakýatsiia jumysyna Almaty qalasy alpinizm federatsiiasynyń eriktileri de kómektesti. Birlesken jumystyń nátijesinde zardap shekken adam "Shymbulaq" taý kýrortyna jetkizildi.
Odan ári týrist Apattar meditsinasy ortalyǵynyń dárigerlerine tapsyrylyp, qalalyq aýrýhanaǵa jetkizildi.
Tótenshe jaǵdailar ministrligi taýǵa shyǵatyn azamattarǵa qaýipsizdik erejelerin saqtap, qaýipti ýchaskelerde barynsha saq bolýǵa keńes berdi.
