Almaty oblysynda ekologiialyq týrizmdi damytý jáne jasyl aimaqtardyń kólemin ulǵaitý baǵytynda birneshe iri ekopark jobasy júzege asyrylýda. Jańa nysandarǵa tartylatyn investitsiia kólemi 22 mlrd teńgeden asady, dep habarlaidy dalanews.kz.
Qazirgi tańda oblys aýmaǵynda jalpy kólemi 69 myń gektardan asatyn 20-dan astam ekopark jumys isteidi. Aldaǵy jyldary olardyń qatary jańa demalys jáne rekreatsiialyq aimaqtarmen tolyqpaq.
Iri jobalardyń biri – aýmaǵy 10 gektar bolatyn «Barys» ekoparki. Jobanyń quny shamamen 1,5 mlrd teńgeni quraidy. Bolashaqta park aýmaǵynda 7 myńnan astam aǵash otyrǵyzý josparlanǵan.
Sonymen qatar jeke investitsiialar esebinen taǵy eki iri joba iske asyrylýda. Aýmaǵy 5,5 gektar bolatyn «Tal Resort» ekoparkiniń quny shamamen 5 mlrd teńgeni quraidy. Qurylys jumystary eki kezeńmen júrgiziledi. Jobanyń birinshi kezeńin 2026 jyldyń sońynda aiaqtaý, al nysandy tolyq paidalanýǵa berýdi 2027 jylǵa josparlanǵan.
Sondai-aq quny 5 mlrd teńge bolatyn «Aykan Resort» ekoparkiniń qurylysy da júrgizilýde. Jobanyń jalpy aýmaǵy 8,5 gektardy quraidy. Nysandy 2027 jyly paidalanýǵa berý kózdelgen.
Budan bólek, 2027–2028 jyldary oblysta taǵy eki joba júzege asyrylady. Atap aitqanda, «Kóshpendiler» ekoparkine shamamen 700 mln teńge, al «Ortalyq saiabaq» jobasyna shamamen 10 mlrd teńge investitsiia tartý josparlanyp otyr.
Almaty oblysy turǵyn úi-kommýnaldyq sharýashylyq jáne abattandyrý basqarmasynyń málimetinshe, atalǵan jobalar óńirdiń týristik áleýetin arttyryp, jasyl aimaqtardy keńeitýge jáne halyq úshin qolaily demalys infraqurylymyn qalyptastyrýǵa múmkindik beredi.
