Almaty halyqaralyq áýejaiynda Fly Arystan áýe kompaniiasynyń ushaǵynda órt shyqty, dep habarlaidy dalanews.kz.
Áýe kompaniiasynyń baspasóz qyzmeti oqiǵanyń 28 tamyz kúni Almaty áýejaiynda bolǵanyn rastady.
Air Astana málimetinshe, órt tehnikalyq jumystar júrgizilip jatqan kezde shyqqan.
– Jumystardy oryndaý barysynda jergilikti órt shyǵý oqiǵasy boldy. Áýejaidyń jedel qyzmetteri ony qysqa ýaqyt ishinde tolyq sóndirdi. Air Astana tobynyń bir qyzmetkeri jaraqat alyp, oǵan meditsinalyq kómek kórsetildi. Keiin dárigerler ony aýrýhanadan shyǵardy, – dep habarlady áýe kompaniiasy.
Oqiǵa kezinde ushaq bortynda jolaýshylar men ekipaj músheleri bolmaǵan.
Qazir áýe kemesi ýaqytsha paidalanýdan shyǵaryldy. Mamandar ushaqqa keltirilgen zaqym kólemin anyqtap, jóndeý jumystaryn júrgizý múmkindigin baǵalap jatyr.
