Almatydaǵy A.P. Chehov atyndaǵy Ortalyq qalalyq kitaphanada «Jumysshy mamandyǵy – meniń tańdaýym» atty tanymdyq kezdesý ótti. Sharanyń maqsaty – jastarǵa jumysshy mamandyqtarynyń qazirgi qoǵamdaǵy róli, olardyń artyqshylyqtary men qalanyń damýyna qosatyn úlesi jaily aitý,- dep habarlaidy Dalanews.kz
Kezdesý kitaphananyń oqý zalynda ótti. Jiynǵa túrli salada eńbek etip júrgen mamandar qatysty. Olardy biriktiretin ortaq nárse – bári de jumysshy mamandyǵynyń ieleri. Atap aitqanda, kezdesýge «Almaty Sý» memlekettik kommýnaldyq kásiporny Túrksib aýdandyq bóliminiń slesary Donesbai Ahanaev, №9 trolleibýstyń júrgizýshisi Makpal Qojamseiitova, №12 órt sóndirý bóliminiń aǵa órt sóndirýshi-qutqarýshysy, azamattyq qorǵanys serjanty Dáýren Sherikbai jáne Respýblikalyq ǵylymi kardiologiialyq ortalyqtyń sanitarkasy Ainagúl Sisenova qatysty.
– Búgingi qonaqtarymyz – sý qubyry men káriz júieleriniń qyzmetin qamtamasyz etip, jolaýshylardy qaýipsiz tasymaldap, órt sóndirip, tótenshe jaǵdailardyń saldaryn joiyp, naýqastardy kútip-baptaityn jandar. Olar óz isin súiip, balalaryna da eńbeksúigish bolýdy úiretip keledi, – dedi kitaphana meńgerýshisi Ainur Balaýbaeva.
Kezdesý barysynda sóz sóilegen «Almaty Sý» mekemesiniń slesary Donesbai Ahanaev jumysshy mamandyǵyna sanaly túrde kelgenin aitty.
– Bul mamandyqty óz erkimmen tańdadym. Basqa salada ózimdi elestete almaimyn. Almaty siiaqty iri megapoliste bul mamandyqtyń mańyzy zor. Prezident Qasym-Jomart Toqaev 2024 jyldy Jumysshy mamandyqtar jyly dep jariialady. Bul biz úshin úlken mártebe, óitkeni jumysshy mamandyqtarynyń bedeli artyp keledi. Ár mamandyq – mańyzdy jáne qajet, – dedi ol.
Shara aiasynda ánshi Beibitgúl Nurymǵojina men Jubanysh Jeksenuly daiyndaǵan kontserttik baǵdarlama keshtiń shyraiyn asha tústi. Kezdesý sońynda qatysýshylar estelik sýretke tústi.
