Áleýmettik jelide Kók-Tóbege kóterilý baǵasyna qatysty syn kóbeıdi, dep habarlaıdy Dala News.
Almaty oblysy ákiminiń baspasóz hatshysy Dıas Nuraqyn Facebook-tegi jazbasynda arqan jol qunynyń qymbattaǵanyn aıtyp, bul jaǵdaıdyń qarapaıym turǵyndarǵa qolaısyz ekenin jetkizdi.
Onyń aıtýynsha, bir adamǵa baryp-kelý baǵasy 10 myń teńgege jetken, al balalarǵa 5 myń teńge. Otbasymen demalýǵa shyqqanda shyǵyn kólemi aıtarlyqtaı ósedi.
«Altaýymyzǵa tek Kók-Tóbege shyǵyp-túsýge 45 myń teńge eseptedi. Tamaq pen basqa shyǵyndardy qossaq, júz myń teńgeden asady», – dedi ol.
Sondaı-aq ol Kók-Tóbege kólikpen kirý qunynyń da joǵary ekenin atap ótti.
Nuraqynnyń pikirinshe, mundaı baǵa saıasaty ishki týrızmniń damýyna keri áser etýi múmkin.
