الەۋمەتتىك جەلىدە كوك-توبەگە كوتەرىلۋ باعاسىنا قاتىستى سىن كوبەيدى، دەپ حابارلايدى Dala News.
الماتى وبلىسى اكىمىنىڭ باسپا ءسوز حاتشىسى دياس نۇراقىن Facebook-تەگى جازباسىندا ارقان جول قۇنىنىڭ قىمباتتاعانىن ايتىپ، بۇل جاعدايدىڭ قاراپايىم تۇرعىندارعا قولايسىز ەكەنىن جەتكىزدى.
ونىڭ ايتۋىنشا، ءبىر ادامعا بارىپ-كەلۋ باعاسى 10 مىڭ تەڭگەگە جەتكەن، ال بالالارعا 5 مىڭ تەڭگە. وتباسىمەن دەمالۋعا شىققاندا شىعىن كولەمى ايتارلىقتاي وسەدى.
«التاۋىمىزعا تەك كوك-توبەگە شىعىپ-تۇسۋگە 45 مىڭ تەڭگە ەسەپتەدى. تاماق پەن باسقا شىعىنداردى قوسساق، ءجۇز مىڭ تەڭگەدەن اسادى»، – دەدى ول.
سونداي-اق ول كوك-توبەگە كولىكپەن كىرۋ قۇنىنىڭ دا جوعارى ەكەنىن اتاپ ءوتتى.
نۇراقىننىڭ پىكىرىنشە، مۇنداي باعا ساياساتى ىشكى ءتۋريزمنىڭ دامۋىنا كەرى اسەر ەتۋى مۇمكىن.
