Almatydaǵy úsh adamnyń ómirin qiǵan jol apatyna qatysty jańa málimetter belgili boldy. Jýrnalist Mihail Kozachkovtyń málimetinshe, Zeekr 9X kóligin 32 jastaǵy kólik salasynda jumys isteitin kásipker basqarǵan, dep habarlaidy Dalanews.kz.
Jýrnalistiń jazýynsha, qaiǵyly oqiǵa 21 naýryz kúni Almatydaǵy Ál-Farabi dańǵylynda bolǵan. 009JET memlekettik nómirli Zeekr kóligi qarsy jolaqqa shyǵyp ketip, Mercedes avtokóligimen betpe-bet soqtyǵysqan.
Soqtyǵys saldarynan jeńil kólikte bolǵan úsh adam – 29 jastaǵy júrgizýshi jáne 20 jáne 22 jastaǵy eki jolaýshy qyz qaza tapty. Al jol talǵamaityn kólikti basqarǵan er adam aýyr jaraqat alǵan: onyń qabyrǵalary, jambas súiegi jáne oń aiaǵy synǵan.
Mihail Kozachkovtyń aitýynsha, oǵan oqiǵaǵa qatysty anyqtama da jiberilgen.
Qujattaǵy málimetke sáikes, Zeekr kóliginiń júrgizýshisi – Almatynyń joǵary bóliginde turatyn 32 jastaǵy Aleksandr Pak. Onyń atyna eki kompaniia tirkelgen: «GÝ HOZÝ Almaty» jáne «Global Partner» JShS. Ol eki uiymnyń da quryltaishysy.
Birinshi kompaniia 2025 jyly ǵana tirkelip, bir jyl ishinde shamamen 500 myń teńge salyq tólegen. Al ekinshi kompaniia – «Global Partner» – 2024 jyldyń kúzinen beri biýdjetke 50 million teńgeden astam salyq aýdarǵan. Bul kásiporynnyń ainalymy edáýir joǵary ekeni baiqalady. Sarapshylardyń aitýynsha, Zeekr 9X avtokóliginiń quny shamamen 100 myń dollar.
Jýrnalistiń pikirinshe, kúdiktiniń qarjylyq múmkindigi onyń jaýapkershilikten jaltarýyna negiz bolmaýy tiis. Ol kináli adam mindetti túrde sot aldynda jaýap berip, jaza alady dep esepteidi. Qoldanystaǵy zańnamaǵa sáikes, Qylmystyq kodekstiń 345-babynyń 4-bóligi boiynsha 5 jyldan 10 jylǵa deiin bas bostandyǵynan aiyrý jazasy qarastyrylǵan.
Alaida bul iste mańyzdy jait bar. Kýágerlerdiń aitýynsha, qaiǵyly túnde Zeekr 9X basqa kólikpen jarysqan bolýy múmkin.
Jýrnalist mundai jaǵdailarda birqatar elderde jaza áldeqaida qatań ekenin atap ótti. Mysaly, Reseide osyndai quqyqbuzýshylyq úshin 15 jylǵa deiin, AQSh-ta 20 jyldan astam, al Germaniiada kei jaǵdailarda ómir boiyna bas bostandyǵynan aiyrý jazasy taǵaiyndalady.
Onyń pikirinshe, Qazaqstan zańnamasynda da osyndai jaǵdailarǵa qatysty jaýapkershilikti kúsheitý máselesin qarastyrý qajet.
