Almatydaǵy avtobýs apatynan qaza tapqandardyń jaqyndary ótemaqy talap etti
Avtobýs apatynan qaza tapqan erli-zaiypty Talap Qosymov pen Gúljahan Jetpisbaevanyń týysy Súiinbai Ońalbekuly park ókilderiniń bir aptadan keiin ǵana kóńil aitqanyn jetkizdi. Olardyń aitýynsha, tipti sol kezde de kómek kórsetý týraly jaq ashpaǵan. Al bul otbasynyń artynda tórt balasy qalǵan. Turyp jatqan baspanalary da nesiege alynǵan eken.
«Bankten 17 million, qalǵanyn ózderi aýyldaǵy úileri men kólikterin satyp páter aldy. Sol banktegi aqshasy jabylsa, balalaryna baspana qalar edi. Endi avtobýs parki jaǵynan úmit kútip otyrmyz. Úmitimizdi aqtaityn shyǵar degen oidamyz», – dedi Súiinbai Ońalbekuly.
Mamandardyń pikirinshe, sot sheshimi shyqqannan keiin qaitys bolǵandardyń jaqyndary azamattyq sotqa aryzdanyp, saqtandyrý kompaniiasyna júgine alady. Al, qoǵamdyq kólik júrgizýshisiniń kinási bolsa da, bolmasa da bul jaǵdaida jábirlengen tarapqa kómek berýi shart.
«Onyń kinási bolsa da, bolmasa da báribir. Sol keltirilgen zalaldy tólep berýi tiis. Adam qaitys bolǵanda 2000 AEK, I toptaǵy múgedek bolsa 1600, II toptaǵy múgedektik úshin 1200, III topqa 500 bala múgedektik alsa bolady», – dedi «Eýraziia» SK atqarýshy direktory Gúlnáz Muhtarova.
Qazir atalǵan fakt boiynsha qylmystyq is qozǵalyp, tergeý amaldary júrip jatyr.
Eske salaiyq, 2023 jylǵy jeltoqsanda Almatyda avtobýs aialdamada turǵan bir top adamdy qaǵyp ketken edi. Saldarynan 3 adam mert boldy.
