– Meniń jeke kózqarasym boiynsha Aqtóbedegi oqiǵadan bilik te, elimizdegi kúshtik qurylymdar da, aqparat quraldary da sabaq alýy kerek edi. Terakt degenińiz eń aldymen – aqparattyq soǵys. Lankesterdiń basty maqsaty – qoǵamdy úreilendirip, biliktiń qandailyq deńgeide álsiz ekenin áshkereleý. Osy aqparattyq soǵysta... memleketimiz 100 paiyzǵa dep aita almaimyn, 70-80 paiyzǵa jeńilis taýyp jatyr. Máselen, Resei, Ázerbaijan, Túrkiia elderindegi aqparat quraldary mundai tótenshe jaǵdaida tún demei, kún demei naqty aqparat taratýǵa qaýqarly ekenin talai márte dáleldedi. Al, bizde resmi málimetter túrli daqpyrttardyń kóleńkesinde qalyp qoiyp jatady.
Mysaly búgin osy oqiǵa bastala salysymen, qandai jaǵdai bolmasyn telearnalar men radiolardy qosyp, ne bolyp jatqanyn resmi túrde jariialanýy kerek edi. Ókinishtisi, olai bolmady. Halyq túrli úreili aqparattardy feisbýk, ýatsap sekildi áleýmettik jelilerden estip-bilip jatyr.
Birinshiden, «Juldyz» yqshamaýdanynan 100 shaqty qarýlanǵan lankes joldaǵysynyń bárin atyp, qyryp keledi eken», «Megatsentrdi basyp alypty», «Vokzalǵa jarylǵysh zat qoiylypty» degen sekildi shyndyqqa janaspaityn aqparattar eldiń esin aldy. Ekinshiden, mundai jalǵan málimet quqyq qorǵaý organy qyzmetkerleriniń kúshiniń jan-jaqqa bólinýine yqpal jasady.
Iaǵni, mundai aqparatty lankestik áreketti jasap otyrǵandardyń ózderi taratyp otyrǵan bolýy múmkin. Sondyqtan, arandatý maqsatynda jalǵan aqparat taratqan azamattar ustalyp, zań aldynda jaýapkershilikke tartylýy kerek.
Almatydaǵy oqiǵany saralap, budan keiin mundai jaǵdaidyń aldyn alý úshin naqty nátijege qol jetkizgenimiz durys.
Túrkiiadaǵy jaǵdai kezinde Premer-ministr, qalanyń ákimi sekildi laýazymdy tulǵalar halyqtyń ishinde júrdi. Biz áli qoǵamǵa basý aityp jatqan resmi tulǵalardy kórip otyrǵan joqpyz. Halyqqa basý aityp jatqandardyń deni – qoǵamdyq belsendiler. Bul negizinen – biliktiń mindeti.
Biz qalaiyq, qalamaiyq elimizge terrorizm uzaq merzimge kelip, ornyǵyp jatyr. Qoǵam endi osyndai oqiǵalarǵa boi úiretip, ómir súrýge beiimdele bastaidy. Al, kúshtik qurylymdar sol teraktilerge toitarys berip, olardyń negizsiz aqparattarynyń keń taralmaýyna bar kúshin salýy qajet.
Derekkóz: abai.kz
